Rusiyada bir necə ay öncə paraşütlə Qara dənizin üzərindən uçurulan və ictimaiyyətin diqqət mərkəzində olan uzunqulaq ölüb. Anapka adlı uzunqulaq Moskvadakı tövlələrdən birində uzun müddət davam edən xəstəlikdən ölüb. Ölümə səbəb ürək çatışmazlığı olub. 

Uzunqulaq Kreml atçılıq məktəbinin tövləsində yaşayıb. Burada heyvan üçün yaxşı şərait yaradılmışdı. O təzə tərəvəzlərdən, meyvə və yemdən ibarət pəhrizlə qidalanırdı, masaj, duş, gəzinti xidmətlərindən yararlanırdı. 

Xatırladaq ki, Anapka 2010-cu ilin ortalarında məşhurlaşıb. O zaman su atraksionlarının sahibi reklam məqsədilə onu paraşütlə havaya qaldırmışdı. Paraşütdən asılı olan heyvan havada bir saata yaxın qalıb. Bu barədə isə nəinki Rusiya, hətta xarici mətbuatda da yazılar dərc edilib. 

"The Sun" qəzetinin əməkdaşları onu sahibindən alaraq qulluq edilmək üçün İngiltərəyə aparmaq istəyib. Lakin onun xaricə göndərilmə prosesi baş tutmamışdı.