Lesya Nikityuk Azərbaycan tamaşaçısına "Oryol i reşka” travel-şousu, eləcə də "Lesya zdes” televiziya verilişi ilə tanışdır. O, "Lesya zdes” telelayihəsində dünyanın müxtəlif ölkələrində kişilərlə tanış olmağın nə dərəcədə asanlığı məsələsindən söhbət açır.
AZXEBER.COM xəbər verir ki, Lesya Nikityuk Report-un Ukrayna bürosuna müsahibəsində bu dəfə "Lesya zdes” verilişinin Bakıdakı çəkilişlərinin necə keçməsindən və Azərbaycan kişisi ilə tanış olmağın asan olub-olmamasından danışıb.
Aparıcı Azərbaycandakı çəkilişlərdən danışarkən deyib: Azərbaycanda neft buruğunda çəkilişdən əvvəlki təhlükəsizlik texnikası üzrə peşəkar təlimat məni heyran etdi. Məni isə çoxlu təlimatlar görmüşəm, inanın!
Aparıcı Bakıda ukraynalılara münasibətdən də danışıb: "Mən ilk dəfə Bakıda oldum. Etiraf edim ki, Ukrayna və onun vətəndaşlarına qarşı bu cür xoş münasibət məni təəccübləndirdi. Özümü həqiqətən arzulanan qonaq kimi hiss etdim. Bu, səmimiyyət və müsbət enerji Azərbaycanda hər yerdə bizi müşayiət elədi.
Bakı məni heyran etdi, elə təəssürat yaranırdı ki, gələcəyin şəhərində olmuşam. Azərbaycan paytaxtının böyümək və inkişaf istəyi həqiqətən valehedicidir!
Bir də inanılmaz dadlı mətbəxiniz var! Odur ki, yüzlərlə təklifdən birini dəyərləndirib bir daha Bakıya gələcəyəm, amma sadəcə istirahət etmək üçün. Hələlik isə bu cür isti qəbula görə Azərbaycan xalqına minnətdarlığımı və təşəkkürümü bildirmək istəyirəm!
Bəs azərbaycanlıya ərə gedərsiniz? sualına aparıcı belə cavab verib: "Şəxsən mənim üçün kişidə ən mühüm xüsusiyyətlərdən biri yumor və... boydur! 1,5 metrdən hündür olması arzuediləndir (gülür)! İdeal kişi isə ezamiyyət, səyahətlər zamanı məni gözləməli, insanın özü ilə daşıya bildiyi yeməklər hazırlaya bilməli, it gəzdirməli və dibçəkləri sulamalıdır (gülür).
Azərbaycanlı kişiyə ərə getmək məsələsinə gəlincə, verilişin Azərbaycana həsr olunmuş bölümü efirə verildikdən sonra sizin kişilərdən o qədər məktub, ismarıc və təkliflər almışam ki, seçimimin necə olacağını bilmirəm! Əvvəlcə mənə elə gəldi ki, ümumiyyətlə, sizin kişilərdə yumor hissləri heç yoxdur! Amma bu, tərbiyənin tərənnümü idi, o baxımdan düşünürdüm ki, azərbaycanlı kişilərlə tanış olmaq heç də asan deyil, bir qədər yaxından tanış olandan, Lesyanın həqiqətən Bakıda olması şoku keçəndən sonra uşaqlar artıq zarafat etməkdən çəkinmirdi".
