“Mən əminəm ki, radikallıqla ən yaxşı mübarizə qəzetlərdə və informasiya resurslarında məqalələr də daxil olmaqla maarifləndirmə işi aparmaqdır”.
APA-nın məlumatına görə, bunu Dini Qurumlarla İş üzrə Dövlət Komitəsinin Dini qurumlarla iş şöbəsinin müdiri Əliheydər Zülfüqarov söyləyib.
Ə. Zülfüqarov bildirib ki, Azərbaycanda vəhhabiliyin, yaxud sələfiliyin yayılması 20-ci əsrin sonlarından başlayıb. Onun sözlərinə görə, ölkə müstəqillik qazandıqdan sonra bu cərəyanın nümayəndələri Azərbaycana gəlməyə və fəallaşmağa başlayıblar: “Xaricdən gələn emissarlar xeyriyyə təşkilatlarının xətti ilə təbliğat aparıb, gəncləri öz sıralarına cəlb etməyə çalışıblar. Vəhhabilərin təsirinə əsasən din haqqında təsəvvürü olmayan insanlar düşüb. Bu radikal dini cərəyanın nümayəndələri öz baxışlarını Qurandan gətirdikləri və əsl mənasını təhrif etdikləri ayə və hədislərlə möhkəmləndirməyə çalışıblar. Əsl islamı təhrif ediblər”.
Şöbə müdiri vurğulayıb ki, Azərbaycanın dini icmaları bu problemə ciddi diqqət yetirməli və profilaktiki mübarizə üsullarından istifadə etməlidirlər: “Ancaq vəhhabilərlə başqa üsullarla mübarizə aparmaq qəbuledilməzdir. Məsələn, onların saqqallarını qırxmaq yolverilməz üsuldur. Onlarla qanun çərçivəsində mübarizə aparılmalıdır”.
