Venera Qız bürcünə keçərək avqustun 6-dək davam edəcək yeni astroloji dövrə start verib.
AZXEBER.COM xarici mətbuata istinadən xəbər verir ki, tanınmış astroloq Dinçer Günerin sözlərinə görə, bu dövr münasibətlərdən maliyyə məsələlərinə, şəxsi baxımdan tutmuş dünya gündəminə qədər bir çox sahədə mühüm dəyişikliklər vəd edir.
Astroloq bildirib ki, bu müddətdə təmtəraqdan daha çox sadəlik, böyük jestlərdən daha çox isə kiçik, lakin səmimi davranışlar ön plana çıxacaq. Onun sözlərinə görə, bahalı hədiyyələr əvəzinə bir fincan qəhvə hazırlamaq, ev işlərində kömək etmək və gündəlik həyatı asanlaşdıran jestlər daha dəyərli hesab olunacaq.
Dinçer Güner xəbərdarlıq edib ki, Qız bürcünün tənqidçi xüsusiyyəti münasibətlərə də təsir göstərə bilər. Kiçik qüsurlara həddindən artıq diqqət yetirmək lazımsız mübahisələrə səbəb ola bilər. Bu səbəbdən tərəflərə mükəmməllik axtarışında münasibətlərini zədələməmək tövsiyə olunur.
Onun fikrincə, bu dövrdə insanlar münasibətlərinə daha realist yanaşacaq və "Bu münasibət mənə yaxşı təsir edir?", "Qarşı tərəf həyatımı asanlaşdırırmı?" kimi sualları daha çox verəcəklər. Sağlam münasibətlər möhkəmlənəcək, problemli münasibətlər isə yenidən nəzərdən keçirilə bilər.
Astroloq qeyd edib ki, Veneranın Qız bürcündə hərəkəti maliyyə sahəsinə də təsir edəcək. Bu müddətdə lazımsız xərclərdən uzaq durmaq, büdcəni planlaşdırmaq, qənaət etmək və maliyyə nizam-intizamını gücləndirmək üçün əlverişli şərait yaranacaq.
Gözəllik sahəsində isə təbiilik ön plana çıxacaq. Ağır makiyaj əvəzinə dəriyə qulluq, sağlam qidalanma, idman, detoks proqramları və sağlam həyat tərzi daha çox diqqət çəkəcək.
Dinçer Güner bildirib ki, bu astroloji keçid yalnız fərdi həyata deyil, dünya gündəminə də təsir göstərə bilər. Onun sözlərinə görə, işçi hüquqları, əməkhaqqı, iş saatları, xidmət sektorunda çalışanların problemləri, qadınların əmək bazarındakı mövqeyi, eləcə də "eyni işə eyni əməkhaqqı" kimi mövzular daha çox müzakirə oluna bilər.
Astroloq əlavə edib ki, kənd təsərrüfatı, ərzaq siyasəti, səhiyyə, dərman sənayesi və tibbi infrastrukturla bağlı məsələlər də bu dövrdə gündəmdə ola bilər.
Mütəxəssisin sözlərinə görə, avqustun 6-dək davam edəcək Venera–Qız bürcü tranziti həm şəxsi həyatda, həm də cəmiyyət səviyyəsində daha planlı, sadə və məhsuldar dövrün başlanğıcı hesab olunur.
Gülay
