Vətəndən qisas almaq

Statistika göstərir ki, yay tətilini Gürcüstanda keçirən azərbaycanlıların sayı sürətlə artır. Maraqlısı isə odur ki, soydaşlarımız təkcə yayda deyil, qışda da Gürcüstanda dincəlməyə üstünlük verirlər. Ötən il 10 mindən çox azərbaycanlı yeni təqvim ilini Tiflisdə qarşılamışdı. İki il əvvəl yanvar ayının 1-də jurnalist həmkarlarımla Tiflisdə dolaşarkən qarşımıza çıxan üç nəfərdən ikisi doğma Azərbaycan dilində danışırdı. 2010-cu ilin soyuq yanvar günlərində Tiflisin bahalı restoranlarında masa arxasında əyləşənlərin yarısından çoxu azərbaycanlılar idi.Ötən gün ailəsi ilə birlikdə Batumiyə yola düşən həmkarımdan yay tətilini niyə Gürcüstanda keçirmək istədiyini soruşanda, belə cavab verdi: “Burda 5 gündə xərclədiyim pulla Gürcüstanda 15 gün bəy kimi yaşayıram”. Gürcüstanda tez-tez olduğum üçün onun bu arqumentinə etiraz etdim. Mübahisə zamanı məlum oldu ki, jurnalist həmkarım Batumi şəhərinin yaxınlığında yerləşən bir kənddə ev tutub. Kirayə tutduğu evdə qaldığı hər gün üçün 20 lari ödəyəcək. Bu isə bizim pulla təxminən 9 manat edir. Üstəlik, həmkarım həyat yoldaşını və 2 uşağını Tiflisə, ordan isə Batumiyə aparmaq üçün 80 manat pul xərcləməli olacaq. Onun həmin tərkiblə geri qayıdacağını nəzərə alanda, təkcə nəqliyyat xərcinin 160 manat etdiyi məlum oldu.Üç il əvvəl biz yay tətilini ailəlikcə Qax rayonunun İlisu kəndində keçirdik. Özünün ikimərtəbəli evinin qapısını taybatay bizim üzümüzə açan Nəzir kişiyə bir həftəlik qonaqpərvərliyin müqabilidə cəmi 70 manat verdik. İlisuda kənd təsərrüfatı məhsullarının qiyməti Gürcüstanda olduğundan da ucuz idi. Sıra dağların əhatəsinde yerləşən bu gözəl kəndin təbiətinə isə söz ola bilməzdi...Yay tətilini Gürcüstanın istirahət mərkəzlərində keçirən soydaşlarımıza haqq vermək olar. Heç kimə sirr deyil ki, Azərbaycanda otel və pansionatların qiyməti çox bahadır. Ayrı-ayrı nazirlərə məxsus olan həmin otellərdə gecələmək üçün bəzən 100-150 manat ödəmək lazım gəlir. Halbuki bu pulla Batumidə bir həftə oteldə qalmaq olar. Heç kim min bir əziyyətlə qazandığı pulların otel biznesi ilə məşğul olan Kəmaləddin Heydərov, Ziya Məmmədov, Etibar Pirverdiyev kimi korrupsioner məmurların cibinə getməsini istəmir. Mən bu adamlara haqq qazandırıram. Heç mən də razı olmaram ki, gözümün nurunu əridə-əridə qazandığım pullar hansısa harın məmurun əyləncəsinə sərf olunsun. Amma Qubada, Qaxda günü 10 manata verilən kirayə evləri qoyub, Gürcüstanın ucqar kəndlərində 9 manata ev tutan adamları heç cür başa düşə bilmirəm. Mənə elə gəlir ki, bu adamlar özləri də bilmədən Kəmaləddin Heydərovun, Ziya Məmmədovun, Etibar Pirverdiyevin qisasını vətəndən alırlar. Hansı ki, onların 10 manatına qaxlı Nəzir dayının gürcü Seryojadan daha çox ehtiyacı var...