Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyi özünüməşğulluq proqramı çərçivəsində "Agro Best” şirkəti ilə 66 milyon 150 min manat dəyərində satınalma müqaviləsi bağlayıb. Müqaviləyə əsasən, layihə iştirakçılarının kənd təsərrüfatı heyvanları və digər zəruri vasitələrlə təmin olunması nəzərdə tutulur. Bununla belə, alınacaq heyvanların sayı və digər təfərrüatlar açıqlanmayıb.
Qeyd edək ki, əvvəlki dövrlərdə özünüməşğulluq proqramı çərçivəsində verilən bəzi heyvanların xəstə və ya sağlamlıq problemlərinin olması ilə bağlı vətəndaşlar tərəfindən müxtəlif narazılıqlar səsləndirilib. Bu baxımdan, yeni satınalma çərçivəsində təqdim ediləcək heyvanların sağlamlıq vəziyyətinə nəzarət məsələsi yenidən diqqət mərkəzinə gəlib.
Liberal İqtisadçılar Mərkəzinin sədri Akif Nəsirli AZXEBER.COM-a açıqlamasında bildirib ki, xəstə heyvanın vətəndaşa təhvil verilməsi nəzarət mexanizmlərində boşluqların olduğunu göstərə bilər:
"Əgər heyvan vətəndaşa təhvil verilən zaman xəstə olubsa, bu, təkcə təchizatçı şirkətin deyil, qəbul prosesinə nəzarət edən dövlət qurumlarının da məsuliyyət məsələsidir. Çünki dövlət vəsaiti hesabına alınan heyvanların keyfiyyətinə ciddi nəzarət edilməli, onların sağlamlığı müstəqil baytarlıq müayinəsi ilə təsdiqlənməlidir. Əgər buna baxmayaraq xəstə heyvan vətəndaşa təhvil verilirsə, bu, nəzarət mexanizmlərində boşluqların olduğunu göstərə bilər”.
O qeyd edib ki, bir çox hallarda vətəndaş heyvanı qəbul etdikdən sonra onun xəstə olduğunu sübut etməkdə çətinlik çəkir:
"Digər problem ondan ibarətdir ki, bir çox hallarda vətəndaş heyvanı qəbul etdikdən sonra onun xəstə olduğunu sübut etməkdə çətinlik çəkir. Nəticədə məsuliyyətin kimə aid olduğu uzun mübahisə mövzusuna çevrilir və zərəri proqram iştirakçısı çəkir. Halbuki proqramın məqsədi aztəminatlı və işsiz insanların gəlir əldə etməsinə kömək etməkdir. Əgər verilən heyvan xəstədirsə və ya qısa müddətdə tələf olursa, proqram öz məqsədini itirmiş olur.
Belə hallarda dövlət yalnız araşdırma aparmaqla kifayətlənməməlidir. Əgər heyvanın təhvil zamanı xəstə olduğu müəyyən edilirsə, onun dərhal sağlam heyvanla əvəz olunması, təchizatçı şirkətə qarşı sanksiyaların tətbiqi və məsul şəxslərin cavabdehlik daşıması təmin edilməlidir. Əks halda, eyni problemlər təkrar yaşanacaq və dövlət vəsaitinin səmərəliliyi ilə bağlı suallar artacaq”.
İqtisadçı deyib ki, bu proqramda daha şəffaf nəzarət mexanizmlərinə ehtiyac var:
"Bu proqramda daha şəffaf nəzarət mexanizmlərinə ehtiyac var. Heyvanların seçilməsi, baytarlıq müayinəsi və vətəndaşa təhvil verilməsi prosesi ictimai nəzarətə açıq olmalı, bütün müayinə sənədləri proqram iştirakçısına təqdim edilməli və müəyyən zəmanət müddəti tətbiq olunmalıdır. Bu həm vətəndaşın hüquqlarını qoruyar, həm də dövlət büdcəsindən ayrılan vəsaitin təyinatı üzrə xərcləndiyinə inamı artırar. Nəticə etibarilə, belə şikayətlərin vaxtaşırı təkrarlanması göstərir ki, tək-tək problemlərdən deyil, nəzarət sisteminin effektivliyi ilə bağlı daha ciddi suallardan söhbət gedir. Dövlətin vəzifəsi yalnız heyvan paylamaq deyil, verilən dəstəyin həqiqətən işlək gəlir mənbəyinə çevrilməsini təmin etməkdir. Bunun üçün isə keyfiyyətə nəzarət, şəffaflıq və məsuliyyət mexanizmləri daha ciddi şəkildə işləməlidir”.
Şahanə Ziyad
