Makiyaj və kosmetik vasitələri başqası ilə paylaşmaq və ya başqasının kosmetik vasitələrindən istifadə etmək qətiyyən olmaz. Bu vasitələr tamamilə şəxsi gigiyena əşyalarıdır və onların ortaq istifadəsi ciddi sağlamlıq riskləri yaradır.
Bu barədə Səhiyyə Nazirliyi Respublika Sanitariya-Karantin Mərkəzinin həkim-gigiyenisti Orxan İsmayılov danışıb.
Bəs hansı kosmetik məhsulların başqası ilə paylaşılması xüsusilə təhlükəlidir? Makiyaj alətləri neçə müddətdən bir təmizlənməlidir?
Vizajist Sevinc Məmmədova AZXEBER.COM-a açıqlamasında deyib ki, ən riskli məhsullar gözə və dodağa birbaşa təmas edənlərdir:
"Ən riskli məhsullar gözə və dodağa birbaşa təmas edənlərdir. Çünki bu məhsullar bakteriya toplayan məhsullar sayılır. Bütün müştərilər üçün gigiyena qaydalarına əməl etmək lazımdır. Süngər və fırçaları birbaşa insana tətbiq etmək olmaz. Süngərlər hər dəfə dezinfeksiya olunmalı və ya yenisi istifadə edilməlidir. Fırçalar isə hər müştəridən sonra mütləq şəkildə yuyulmalıdır”.
"Ümumən, ortaq materiallardan istifadə etmək olmaz. Fırçalar və digər alətlər bakteriya topladığı üçün onların dezinfeksiyası vacibdir. Vizajda gözəl nəticə ilə yanaşı, müştərinin sağlamlığı və təhlükəsizliyi də önəmlidir.
Müştərilər vizajistin fırça və süngərlərinin təmizliyinə diqqət etməlidirlər. Müştəri ustanın işindən daha çox gigiyenasına fikir verməlidir. İnsan üçün üz çox vacibdir. Süngərdən yayılan infeksiyanı təmizləmək çox çətindir”.
Şahanə Ziyad
