“Oğlum dini təhsil almaq adı ilə Pakistana getmişdi, üç gün əvvəl Pakistandan gizli nömrə ilə zəng vurub dedilər ki, Xəqani şəhid olub”
AZXEBER.COMun məlumatına əsasən,Xəqani İmamverdiyevin atası Sahib İmamverdiyev bu barədə açıqlamasında deyib.
O, qeyd edib ki, oğlu Azərbaycan Dövlət Neft Akademiyasının tələbəsi olub: “Xəqani dördüncü kursda oxuduğu zaman, yəni 2010-cu ilin mart ayının 2-si akademiyanın 5 tələbəsi ilə birlikdə dini təhsil almaq adı ilə Pakistana gedib. Pakistana gedəndən sonra tez-tez evə zəng edirdi. Orada dini təhsil aldığını deyirdi. Sonuncu dəfə ötən il dekabrın 21-də evə zəng edərək hər şeyin qaydasında olduğunu bildirdi. Oğlum Azərbaycanı tərk edən kimi polisə və Milli Təhlükəsizlik Nazirliyinə məlumat verdim. Universiteti başa vurmadığı və əsgər getmədiyi üçün onun barəsində axtarış elan edildi. Mütəmadi olaraq hüquq-mühafizə orqanları ilə əlaqə saxlayıb onun taleyi ilə maraqlanmışam”.
S. İmamverdiyev oğlunun ölüm xəbərinə inanmadıqlarını bildirib: “Yanvarın 21-də böyük oğlumun əl telefonuna gizli nömrədən zəng gəlib. Deyiblər ki, Pakistandan zəng edirik. Sizin övladınız Xəqani dekabrın 29-da şəhid olub. Onun ölümü bizim üçün müəmmalıdır. Çünki zəng edənin kim olduğunu belə bilmirik. Bu gün Pakistanın Azərbaycandakı səfirliyinə müraciət edərək Xəqaninin taleyinə aydınlıq gətirilməsini xahiş edəcəyəm”.
Qeyd edək ki, 23 yaşlı Xəqani Sahib oğlu İmamverdiyevin ABŞ Silahlı Qüvvələrinin hücumu zamanı öldürüldüyü bildirilib.
Xatırladaq ki, 2010-cu ildə ölkə mətbuatında Azərbaycan Dövlət Neft Akademiyasının bir qrup tələbəsinin ölkədən qaçaraq xaricdə radikal dini qruplaşmalara qoşulması barədə məlumatlar verilib.
