Yeni Azərbaycan Partiyasının mətbuat xidməti erməni KİV-də yayılan məlumatı təkzib edib.
YAP-ın mətbuat xidmətindən AZXEBER.COM-a verilən məlumatda bildirilir ki, bəzi erməni KİV-lərində dekabrın 3-də Rusiyanın Sankt-Peterburq şəhərində keçirilən "XXI əsrdə Avrasiya inteqrasiyası" forumu çərçivəsində Rusiyanın "Yedinaya Rossiya", Ermənistanın Respublika Partiyası, Qazaxıstanın "Nur Otan" Xalq-Demokratik Partiyası və Yeni Azərbaycan Partiyası arasında əməkdaşlıq haqqında protokol imzalanması barədə yayılmış məlumat həqiqəti əks etdirmir. Açıqlamada qeyd olunub ki, Yeni Azərbaycan Partiyasının nümayəndələri Hadı Rəcəbli və Mirkazım Kazımov Sankt-Peterburqda keçirilən həmin tədbirdə iştirak edib, lakin partiyalararası əməkdaşlığı nəzərdə tutan hər hansı sənədə YAP adından imza atmayıb.
