Yeni Azərbaycan Partiyasının Gənclər Birliyi Ulu Öndər Heydər Əliyevin 90 illik yubileyi münasibəti ilə bir çox layihələrə start verib". Bu barədə SİA-ya Yeni Azərbaycan Partiyası Gənclər Birliyinin sədri Seymur Orucov deyib.
Onun sözlərinə görə, bu layihələr Ümummilli Liderin doğum gününə qədər davam edəcək: “Biz Ulu Öndər Heydər Əliyevin 90 illik yubileyi münasibəti ilə paytaxt gənclərinin bir neçə günlük regionlara səfərini təşkil edirik. Artıq Qaradağ, Xəzər, Nərimanov gəncləri Azərbaycanın regionlarına səfərə gediblər. Onlar regionlarımızdakı gənclərlə görüşlər keçiriblər. Keçən həftə qərb bölgəsinin gənclərinin paytaxta səfərini təşkil etmişik. Onlar, Ulu Öndərin Fəxri Xiyabandakı məzarını, Şəhidlər Xiyabanını ziyarət edib, “Heydər Əliyev Fondu” və “Heydər Əliyev Mərkəzi” ilə tanış olublar. Daha sonra Milli Məclisin sədr müavini Bahar Muradova ilə səmimi görüş keçirilib. Qeyd edim ki, bu həftə də tədbirlərimiz davam edəcək. Bundan əlavə bir çox idman yarışları, voleybol və futbol turnirlərinə , Azərbaycan Dövlət İqtisad Universiteti ilə birgə şahmat turnirinə start vermişik. Daha sonra yeniyetmələr arasında bir sıra intellektual yarışmaların, siyasi biliklər olimpiadası və başqa tədbilərin keçirilməsi nəzərdə tutulub. Həmçinin bu tədbirlər paytaxt Bakı ilə yanaşı regionlarımızda da təşkil olunur”.
