Bu gün Yeni Azərbaycan Partiyasının sədr müavini, icra katibi, millət vəkili Əli Əhmədov Çin Kommunist Partiyasının mərkəzi komitəsinin xarici əlaqələr şöbəsi nazirinin müavini Çen Fensyanın başçılıq etdiyi nümayəndə heyəti ilə görüşüb. Görüşdə Çin Kommunist Partiyasının mərkəzi komitəsinin xarici əlaqələr şöbəsi nazirinin müavini Çen Fensyan keçən gün keçirilən tədbirin yüksək səviyyədə təşkili münasibətilə təbriklərini çatdırıb. O bildirib ki, Çin Kommunist Partiyası bu səviyyədə təşkil olunan beynəlxalq tədbirlərin keçirilməsini yüksək qiymətləndirir. Onun sözlərinə görə, ötən gün mövzusu modernləşmə siyasət olan konfransda aparılan müzakirələr qlobal problemlərin həllinə müsbət təsir göstərəcək: “Bildiyimizə görə, dekabrın 24-də Azərbaycanın prezidenti İlham Əliyevin 50 illik yubileyi qeyd olunacaq. Onun rəhbərliyi sayəsində Azərbaycan mühüm beynəlxalq əlaqələr qurub, bütün sahələrdə yüksək irəliləyişlər əldə edib. Ölkəniz də ildən-ilə daha da gözəlləşir, daha da inkişaf edir. Bir sözlə, partiyalararası əlaqələr həmçinin ölkələr arasındakı əməkdaşlığa öz müsbət töhfələrini verəcək. Azərbaycanın son illərdəki inkişafı göz önündədir. Partiyalar arasında əlaqələrin inkişafı iki dövlətin və xalqlarımızın münasibətlərinə də xoş təsir göstərir”.
Görüşdə Əli Əhmədov bildirib ki, Çindəki iqtisadi yüksəliş Azərbaycanla yanaşı bütün dünya ölkələrinin də diqqəti mərkəzindədir. Bu ölkə bütün sahələrdəki inkişafı ilə dünyanın diqqət və marağını özündə cəlb edir. Partiyalar arasındakı əlaqələri yüksək qiymətləndirən YAP sədr müavini qeyd edib ki, bu sonrakı inkişaf baxımından da çox əhəmiyyətli və önəmlidir. “Ölkələr arasındakı əlaqələrin inkişafına partiyalararası münasibətlər də öz təsirini göstərir. İnanırıq ki, Azərbaycan və Çin partiyaları arasındakı qarşılıqlı əlaqələr gələcək dostluq münasibətlərinin inkişafına öz müsbət təsirini göstərəcək”, - o deyib.
Ə.Əhmədov qeyd edib ki, Azərbaycanın iqtisadi inkişafı bütün sahələrdə Çinlə əməkdaşlıq etməyə imkan verir. O həmçinin qeyd edib ki, modernləşmə siyasəti bu gün dünya miqyasında əsas problemlərdən biri kimi özünü biruzə verir və bunun həlli istiqamətində ölkələr öz səyini əsirgəməməlidir.
Görüşdə Çen Fensyan YAP nümayəndə heyətini 2012-ci ildə Çinə səfər etməyə dəvət edib.
Qeyd edək ki, görüşdə YAP-ın icra katibinin müavinləri Siyavuş Novruzov və Mübariz Qurbanlı da iştirak edib.
