Yaponiya ballistik raketin buraxılması ilə əlaqədar Koreya Xalq Demokratik Respublikasına (KXDR) etirazını bildirib.
AZXEBER.COM xəbər verir ki, bu barədə Yaponiya Müdafiə Nazirliyi "X" sosial şəbəkə hesabında məlumat yayıb.
"KXDR-nin davam edən ballistik raket buraxılışları da daxil olmaqla hərəkətləri ölkəmizin, regionun və beynəlxalq ictimaiyyətin sülhü və təhlükəsizliyi üçün təhlükə yaradır. Ballistik raketlərin buraxılması BMT Təhlükəsizlik Şurasının qətnamələrini pozur və əhalinin təhlükəsizliyi baxımından ciddi problem yaradır", - deyə məlumatda bildirilir.
Daha əvvəl verilən məlumata görə, KXDR şərq istiqamətində müəyyən edilməmiş tipli ballistik raket buraxılışı həyata keçirib.
Buraxılış aprelin 19-da səhər saatlarında Sinpo ərazisində qeydə alınıb. Bu, KXDR-nin ilin əvvəlindən bəri yeddinci ballistik raket buraxılışıdır.
"Kyodo" agentliyinin məlumatına görə, raket təxminən 10 dəqiqə uçub və Yaponiyanın müstəsna iqtisadi zonasından kənara düşüb. Hadisə nəticəsində zərər qeydə alınmayıb.
Oxu.Az
