Yaponiyada son günlərdə müşahidə olunan ekstremal istilərin acı nəticələri ortaya çıxmağa başlayıb.
AZXEBER.COM Türkiyə mediasına istinadən xəbər verir ki, Yaponiya Yanğın və Fəlakət İdarəetmə Agentliyinin 16-22 iyun tarixlərini əhatə edən statistik məlumatlarına əsasən, ölkənin 14 prefekturasında ümumilikdə azı 18 nəfər günvurma nəticəsində həyatını itirib, 8.603 nəfər isə günvurma əlamətləri ilə xəstəxanaya yerləşdirilib.
Agentliyin açıqlamasında bildirilib ki, bu dövrdə 210 nəfər ciddi vəziyyətdə olub və onların 3 həftədən artıq xəstəxanada qalması tələb olunub. 3.032 nəfər isə orta dərəcəli vəziyyətdə olub və qısa müddətli müalicə alıb. Ən çox günvurma halı Tokyo (896 nəfər), Aichi (706 nəfər) və Saitama (648 nəfər) prefekturalarında qeydə alınıb.
Xüsusilə 65 yaş və yuxarı şəxslər bu halların 61,8 faizini təşkil edib – yəni ümumilikdə 5.316 nəfər.
Ölkədə iyunun 17-də aparılan ölçmələrə əsasən, 914 meteoroloji məntəqədən 65-də 35 dərəcə və ya daha yüksək temperatur qeydə alınıb. İyunun 19-da isə Gifu prefekturasında temperatur 36,9 dərəcəyə, Gunma və Oita prefekturalarında 36,7 dərəcəyə, Kochidə isə 36,5 dərəcəyə çatıb.
Mütəxəssislər istilərin iyun ayının sonuna qədər davam edəcəyini proqnozlaşdırır və ictimaiyyəti günvurma riskinə qarşı ehtiyatlı olmağa çağırırlar.
Oksana
