Yataqxanada güclü yanğın baş verdi

Bakının Ramana qəsəbəsində yerləşən 31 saylı yataqxanada yanğın baş verib. Zeynalov Rizvan Eldar oğluna məxsus evdə yaranmış yanğın nəticəsində ikiotaqlı mənzil bütün əşyaları ilə birgə yanıb. Güclü alov evi bütövlükdə öz ağuşuna aldığı zaman, içəridə hətta ev sahibinin 4 yaşlı övladı Elmar da olub. Xoşbəxtlikdən balaca Elmar anasının ayıq-sayıqlığı nəticəsində vaxtında alovun pəncəsindən xilas ola bilib. Evin xanımı Sevil Zeynalova isə qollarından və üzündən ciddi yanıq xəsarətləri alıb. Yaralı elə qonşuların köməkliyi ilə 5 saylı Şəhər Xəstəxanasının yanıq şöbəsinə çatdırılıb və ona lazımi tibbi yardım göstərilib. Hadisə baş verən ünvana dərhal Fövqəladə Hallar Nazirliyinin Yanğından Mühafizə Xidmətinin əməkdaşları gəlib və alovun qonşu mənzillərə keçməsinin qarşısı vaxtında alınıb. Güclü alov dəf edilsə də, Zeynalovların evində yanğın artıq öz sözünü deyib. Evdən qismən salamat şəkildə ancaq qıraq-bucaqları yanmış yorğan-döşəkləri çıxarmaq mümkün olub. Şahidlərin sözlərinə görə, yanğın olan ikinci otaqda hər şey yansa da, şkaf içərisindəki müqəddəs Qurani-Kərim kitabı ilə birgə salamat qalıb. Binada təxminən 60 ailə məskunlaşıb. Ancaq yanğın bir mənzili əhatə edib. Qeydə alınmış yanğının səbəblərini FHN-nin təhqiqat qrupu araşdırıb. İlkin versiyaya görə, hadisəyə elektrik xətlərində yaranmış nasazlıq səbəb olub. Faktla bağlı başlanılan araşdırmalar davam edir.