Xəbər verdiyimiz kimi, Əmək və əhalinin sosial müdafiəsi naziri Anar Əliyevin imzaladığı əmrlərlə Məmmədov Fuad Hüseynağa oğlu və Paşayev Hüseyn Ələsgər oğlu Dövlət Tibbi Sığorta və Ekspertiza Agentliyinin İdarə Heyətinin sədrinin müavini təyin ediliblər.
AZXEBER.COM-un "Unikal"a istinadən məlumatına görə, Fuad Məmmədov 1985-ci ildə Bakı şəhərində anadan olub. Bakalavr təhsilini Azərbaycan Dövlət İqtisad Universitetində alıb, daha sonra eyni universitetin "Dövlət strukturlarında idarəetmə” ixtisası üzrə magistr pilləsindən məzun olub.
Əmək fəaliyyətinə 2008-ci ildə "Grandmart” MMC-də mütəxəssis olaraq başlayıb. 2010-2016-ci illərdə "Azərsun Holdinq” MMC və "İntersun Menecment Kompani” MMC-də müxtəlif vəzifələrdə çalışıb. 2016-2020-ci illər ərzində "Sunfood” MMC-də əvvəlcə şöbə müdiri, daha sonra departament müdiri vəzifələrinə təyin olunub. 2020-2023-cü illərdə "Veysəloğlu” MMC və "Mares” MMC-də departament müdiri vəzifəsində işləyib. 2023-cü ildə "Solver” MMC-də icraçı direktor vəzifəsinə təyin edilib. 2023-cü ilin noyabr ayında Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyində İdarə Heyəti sədrinin müşaviri vəzifəsinə təyin olunub.
Hüseyn Paşayev 1973-cü ildə Tovuz rayonunda anadan olub. 1990-1995-ci illər ərzində Azərbaycan Dövlət Neft Akademiyasında mühəndis-iqtisadiyyatçı ixtisası üzrə ali təhsil alıb. 1995-2002-ci illər ərzində özəl sektorda satış, biznesin inkişafı və marketinq meneceri olaraq çalışıb.
2002-2006-cı illərdə Azərbaycan Respublikası Dövlət Neft Şirkətinin Prezidentinin Katibliyində çalışıb, 2006-cı ildə İqtisadi İnkişaf Nazirliyinin Sahibkarlığın İnkişafı Departamentində direktor müavini vəzifəsinə təyin edilib. 2007-2015-ci illərdə İqtisadiyyat və Sənaye Nazirliyinin Sahibkarlığın inkişafı siyasəti şöbəsinin müdir müavini vəzifəsində çalışıb. 2015-2018-ci illər ərzində "Azərbaycan İnvestisiya Şirkəti” ASC-də icraçı direktorun müavini vəzifəsində işləyib. 2018-2020-ci illər ərzində Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun müxtəlif idarələrində rəis olaraq çalışıb. 2020-ci ilin iyul ayından etibarən Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun Sosial Sığorta və Fərdi Uçot üzrə Mərkəzi Filialının direktoru vəzifəsində çalışırdı.
