Azərbaycan yol polisi ölümlə nəticələnən yol qəzalarının artmasından narahatdır
Daxili İşlər Nazirliyinin Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovnikiKamran ƏliyevTrend-ə bildirib ki, təkcə sentyabrın 16-da Azərbaycanda baş verən 24 yol yol-nəqliyyat hadisəsi zamanı 15 nəfər ölüb, 33 nəfər xəsarət alıb. Şöbə rəisi qeyd edib ki, baş verən qəzaların əksəriyyəti sürücülərin sürət həddini aşması nəticəsində baş verib: "Bununla bağlı bir daha bildiririk ki, sürücülər baş verən bu hadisələrdən nəticə çıxarmalıdırlar. Sürücülər bilməlidirlər ki, sürət həddinə məhəl qoyulmaması sonda ağır nəticələrə və ailə faciələrinə gətirib çıxarır. Ona görə də Baş Dövlət Yol Polisi İdarəsi bir daha nəqliyyat vasitələrini idarə edən sürücüləri sürət həddini aşmamağa çağırır". Onun sözlərinə görə, ölənlərdən biri azyaşlı olub. Ucar rayonunda baş verən qəza zamanı dünyasını dəyişən uşağın cəmi 2 yaşı olubmuş. K. Əliyev əlavə edib ki, ötən gün yol qəzalarında ölən və xəsarət alanlar arasında məktəb yaşlı uşaqların olduğu qeydə alınmayıb.
