Yol polisləri və taksi sürücüləri “Eurovision-2012”yə hazırlaşır

Yol polisləri və taksi sürücüləri “Eurovision-2012”yə hazırlaşır - FOTOLAR

Bütün Xəbərlər

20:42 14.05.2012

1784

Onlar şəhərimizə gələn xarici qonaqlarla sərbəst ünsiyyət qura biləcəklər. Azərbaycanda “Eurovision-2012” mahnı müsabiqəsinə ictimai dəstək-tariximizin və mədəniyyətimizin təbliği” adlı yeni layihənin icrası davam edir. Layihə Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Jurnalistika və İnkişaf Mərkəzi” İctimai Birliyi və Bakı Şəhər Dövlət Yol Polisi İdarəsi (BŞDYPİ) tərəfindən icra olunur. Layihə çərçivəsində taksi sürücüləri və yol polisləri “Eurovision-2012” mahnı müsabiqəsi ilə bağlı maarifləndirilirlər. Mayın 14-də Bakı Şəhər Dövlət Yol Polisi İdarəsinin və “Jurnalistika və İnkişaf Mərkəzi” İctimai Birliyinin əməkdaşları paytaxtın Səbail rayonu ərazisində yol polislərinə və taksi sürücülərinə Azərbaycan və ingilis dillərində söz və söz birləşmələrinin əks olunduğu kitabça, Azərbaycan və onun işğal olunmuş əraziləri, əhalisi, etnik tərkibi haqqında qısa məlumatların, istirahət mərkəzləri, otellər, dini obyektlər barədə məlumatların əks olunduğu bukletlər paylayıblar. Şəhərimizin qonaqları Azərbaycan və ingilis dillərində çap olunan bukletlərin köməyi ilə sərbəst hərəkət edə bilərlər. Bakı Şəhər Dövlət Yol Polisi İdarəsinin bölmə rəisi, polis polkovnik-leytenantı Vaqif Əsədov bildirib ki, idarə ilə “Jurnalistika və İnkişaf Mərkəzi” İctimai Birliyi “Eurovision-2012” mahnı müsabiqəsi ərəfəsində müəyyən təbliğat xarakterli tədbirlərin görülməsi üçün birgə tədbirlər planı hazırlanıb. Tədbirlər planının nəzərdə tutulmuş tələbinə uyğun olaraq ölkəyə gələn qonaqların qarşılanması, onlarda paytaxt ərazisində hərəkət etmək üçün təsəvvür yaranması, eləcə də Azərbaycandakı tarixi abidələrin məkanı barədə informasiyaların yer aldığı xüsusi bukletlərin paylanmasıdır və bu istiqamətdə işlər aparılır: «Artıq bir həftədir ki, xüsusi çapdan çıxmış bukletlərin və yaxud ingiliscə danışıq lüğətinin paytaxtımızda paylanılması həyata keçirilir. Lüğətlər və bukletlər ictimai nəqliyyat vasitələrini idarə edən sürücülərə, eyni zamanda, yol polisi əməkdaşlarına da paylanılır. Onlar lüğət vasitəsilə çox asan şəkildə xarici vətəndaşlarla danışa biləcəklər». Sürücülərin əksəriyyəti bu kitabçalara böyük ehtiyac duyduqlarını və bu vəsaitlərin köməyi ilə xidmət göstərəcəkləri xarici qonaqlarla ünsiyyət qura biləcəklərini deyiblər.