Seçkilər yaxınlaşdıqca Milli Şura fəallaşmaq əvəzinə, daha da dərin böhrana girir.
Qurumun üzvü olmayan partiyalar və siyasətçilər də Milli Şurada ümidsiz vəziyyətin yarandığı qənaətindədirlər.Milli Şurada təmsil olunmayan Ümid partiyasının sədri İqbal Ağazadə Yurd TV-yə açıqlamasında şuranın hətta öz üzvlərini də ümidsizliyə saldığını deyib:“Milli Şura, sadəcə olaraq, ümidləri doğrultmadı. Bir qrup ümidlərini ciddi şəkildə bağladı o təşkilata və o ümidlər doğrulmadı”.“Yeni Müsavat” qəzetinin baş redaktoru Rauf Arifoğlu isə Yurd TV-yə açıqlamasında deyib ki, Milli Şuradakı böhrandan çıxış yolu kimi alternativ vahid namizəd variantı seçilsə də, indi Milli Şura adı ilə proseslər həmin namizədin seçki qərargahında cərəyan edir. Qurumun özünü isə yox hesab etmək olar:“Milli Şura formatı isə o dərəcədə ciddi böhran yaşayır ki, onu artıq yox da hesab etmək olar. Yəni Milli Şuranın təsisçilərinin bir-birilərinə ittihamları var, bir-birini xəyanətdə və başqa-başqa əməllərdə suçlayırlar və bütün siyasi birliklərdə bu cür vəziyyət böhranlı vəziyyət sayılır və formatın sıradan çıxması kimi hesab olunur.Bu, mənim şəxsi fikrim deyil, bu, sırf siyasi yanaşmadır, politoloji təhlildir. Bu təhlillər də onu göstərir ki, artıq Milli Şuranın bu ilin əvvəllərindən başlayaraq qurulan və formalaşdırılan formatı yoxdur, işləmir”.Xalq Cəbhəsi Partiyası (AXCP) sədrinin müavini Razi Nurullayev isə Milli Şuranın fəaliyyətini Rüstəm İbrahimbəyovun qayıdışı kontekstindən dəyərləndirib:“Rüstəm İbrahimbəyovun özünün Bakıda olması, Milli Şuraya rəhbərlik etməsi və vahid namizədi dəstəkləməsi çox uğurlu bir addım olardı və Milli Şura üzvlərinin əksəriyyəti bu düşüncədədir ki, Rüstəm İbrahimbəyov Azərbaycanda olsaydı, Cəmil Həsənlinin seçki kampaniyası daha uğurla aparıla bilər”.“El” hərəkatı Ali Məclisinin sədri Eldəniz Quliyev Milli Şuranın fəaliyyətində yaranmış böhranın əsas səbəbkarı kimi məhz adıçəkilən hərəkatın göstərilməsi ilə razılaşmır:“Bütün müxalif qüvvələri, demokratik düşərgəni bir araya gətirərək, demokratik düşərgəni demokratik qüvvəyə çevirə bildik. İndi biz oradan niyə ayrılmalıyıq?Heç ayrılmaq fikrimiz də yoxdur... Bəlkə elə bunu istəyirlər... Qoy narahat olmasınlar, “El” hərəkatı Milli Şuradakı fəaliyyətinin bundan sonra daha da artıracaq”.Daha ətraflı Yurd TV-nin bu süjetində:
