AZXEBER.COM medicina.az-a istinadən xəbər verir ki, bu barədə "The Conversation"a York St John's Universitetinin tədqiqatçıları məlumat verib.

Psixoloqlar ortoreksiyanın bir növ psixi pozğunluq olduğunu xatırladıblar. Bildirilib ki, bu zaman insan yalnız təbii qidaları yeməklə maraqlanır:

"Onların nəzdində "zərərli" kateqoriyaya çox vaxt həm ultra emal olunmuş qidalar (fast food, çörək, qənnadı məmulatları), həm də minimal emal olunmuş qidalar (konservlər, meyvə və tərəvəz konservləri, quru meyvələr) daxildir".

Mütəxəssislərin fikrincə, ortoreksiya ilə anoreksiya arasındakı əsas fərq prinsipcə bütün qidalardan yox, qeyri-sağlam qidalardan imtina və onların istehlakının potensial nəticələrinə görə yaranan irrasional qorxudur.

Ciddi pəhrizdəki kiçik bir "səhv" belə, ortoreksiyalı bir insanın özünü günahkar və narahat hiss etməsinə səbəb ola, onun psixikasına zərər verə bilər.

Bu zaman xəstənin fiziki sağlamlığı da pisləşir. Çünki ortoreksiya daim məşq etmək və yağlar, karbohidratlar kimi qida maddələrinin qəbulunu məhdudlaşdırmaq istəyi ilə müşayiət olunur.

Bu səbəbdən düzgün qidalanmaya həddən artıq bağlılıq yuxu keyfiyyətinin aşağı düşməsinə, əhval-ruhiyyənin pisləşməsinə, enerji səviyyəsinin azalmasına, apatiyaya və beyin funksiyasının pisləşməsinə səbəb olur.