Ölkəmizin aparıcı banklarından biri olan Bank Respublika və Sahibkarlığın İnkişafı Fondu (SİF) 22 iyul - Milli Mətbuat Günü ərəfəsində ölkənin aparıcı media nümayəndələri üçün ənənəvi press-tur təşkil edib.
2 gün davam edən press-tur çərçivəsində mətbuat nümayəndələri SİF və Bank Respublika dəstəyi ilə Lənkəranda sahibkarlıq fəaliyyəti göstərən müəssisə və təsərrüfatlarla tanış olublar.
Media nümayəndələri ilk öncə Lənkəranda qənnadı məhsullarının istehsalı ilə məşğul olan "La Ran” müəssisəsinin fəaliyyəti ilə tanış olub. Qeyd edilib ki, müəssisədə istehsal edilən 5 növdə və 56 çeşiddə qənnadı məhsulları daxili bazarla yanaşı, "Made in Azerbaijan" brendi altında bir çox xarici ölkəyə ixrac olunur.
Daha sonra media nümayəndələri "Lenk Fruit” MMC-nin Lənkəran rayonunun Separadi kəndində salınmış sitrus bağlarında olublar. Görüşdə bildirilib ki, təsərrüfatda 110 hektar sahədə naringi və limon, 20 hektarda şaftalı, 5 hektar sahədə nektarin və 7 hektarda giləmeyvə bağı salınıb. İstehsal olunan meyvələr ölkə bazarlarında satılmaqla yanaşı, Avropa bazarlarına da ixrac edilir.
Səfər çərçivəsində "Bank Respublika”nın İdarə Heyətinin sədri Tariyel İsmayılov media nümayəndələri ilə görüşüb. Milli Mətbuat Günü münasibətilə media nümayəndələrini təbrik edən Bankın sədri, məsuliyyətli və şərəfli işlərində yeni-yeni uğurlar arzulayıb. Görüşdə həmçinin, Bank Respublika-ın son illərdə əldə etdiyi uğurlu nəticələr haqda ətraflı məlumat verilib, SİF ilə uğurlu əməkdaşlıq sayəsində ölkəmizdəki sahibkarlara verilən dəstəkdən söz açılıb. Səmimi şəraitdə keçən görüşdə Bankın sədri media nümayəndələrinin suallarını cavablandırıb və belə görüşlərin mütəmadi olaraq keçiriləcəyini bildirib.
Daha ətraflı məlumatı bankın rəsmi saytında eləcə də facebook, instagram, linkedin, telegram səhifələrində və ya Bankın Çağrı Mərkəzinə 144 nömrəsinə zəng edərək əldə edə bilərsiniz.
