Gənclər və idman naziri Azad Rəhimovun, Prezident Administrasiyasının siyasi təhlil və informasiya təminatı şöbəsinin müdiri Elnur Aslanovun, biznes, media və digər sektorları təmsil edən şəxslərin iştirak etdiyi mərasimdə “İrəli” İctimai Birliyinin sədri, millət vəkili Ceyhun Osmanlı mərkəz barəsində qonaqlara məlumat verib.

Onun sözlərinə görə, Gənclər və İdman Nazirliyi, “Atəşgah Sığorta” və “hp” şirkətinin dəstəyi ilə yaradılan mərkəz çoxfunksiyalı fəaliyyət göstərəcək. Ümumi ərazisi min kvadrat metr olan “İrəli” Gənclər Mərkəzində müxtəlif istiqamətlər üzrə təlimlər keçiriləcək: “Mərkəz bütünlüklə kompüterləşdirilib. Burada müasir kitabxana, gənclərin maarifləndirilməsi məqsədilə bir sıra imkanlar yaradılıb”.

Gənclər və idman naziri Azad Rəhimov “İrəli” İctimai Birliyinin gənclər sektorundakı fəaliyyətini müsbət xarakterizə edib. Onun sözlərinə görə, “İrəli” İctimai Birliyinin layihələri gənclərin maarifləndirilməsinə yönəldiyindən, həmişə uğur qazanıb: “Mərkəzin yeni binasının bundan sonra görülən layihələrin uğurla nəticələnəcəyinə səbəb olacağına ümid edirəm. Hesab edirəm ki, gələcəkdə təşkilat beynəlxalq səviyyəli tədbirlərin Azərbaycanda keçirilməsinə nail olacaq”.

A. Rəhimov diqqəti dövlətin gənclər siyasətinə və təmsil etdiyi qurumun bu istiqamətdə gördüyü işlərə yönəldib: “Bu gün Azərbaycanda 200-dən artıq gənclər təşkilatı fəaliyyət göstərir. 2009-2010-cu illərdə onların layihələrinə 2 milyon manatdan çox vəsait ayrılıb”. O, Azərbaycan əhalisinin 3 milyondan çoxunun gənc olduğunu da qeyd edib.

Prezident Administrasiyasının siyasi təhlil və informasiya təminatı şöbəsinin müdiri Elnur Aslanov isə birliyi gənclərin maarifləndirilməsi istiqamətində layihələrə üstünlük verməyə çağırıb./// APA

{jcomments off}