Səfirliyin mətbuat katibi Kis Bin “Media forum” saytına açıqlamasında deyib ki, ABŞ səfirliyinin nümayəndəsi aprelin 8-də bir sıra diplomatların Müsavat Partiyasının qərargahında müxalifət partiyalarının sədrləri ilə keçirdiyi görüşdə iştirak edib: “Lakin o yalnız çıxışlara qulaq asıb, məlumat alıb, hər hansı çıxış etməyib, kiməsə göstəriş verməyib”.
Kis Binin fikrincə, ABŞ səfirliyini ittiham edənlər diplomatların rolunu başa düşmürlər: “Diplomatların həm hakimiyyət, həm də müxalifət nümayəndələri ilə görüşməsi adi haldır. Bu, dünyada qəbul olunan normal haldır və diplomatların işidir. Ona görə də ABŞ səfirliyinin nümayəndəsi müxalifətlə keçirilən tədbirdə iştirak edib. Biz hər gün hakimiyyətin nümayəndələri ilə görüşürük. Bunlar diplomat kimi bizim işimizdir. Əgər hakim Yeni Azərbaycan Partiyasından da dəvət gəlsə, biz onlarla görüşərik”.
Kis Bin qeyd edib ki, ABŞ-ın Azərbaycanda inqilab etmək istəməsi və bunun üçün müxalifətə göstəriş verməsi kimi iddialara səfir Metyu Brayza da bir neçə dəfə açıq bəyanat verib: “Biz Azərbaycanda inqilab etmək istəmirik. Səfir Metyu Brayza bir neçə dəfə bu mesajı cəmiyyətə çatdırıb, hakimiyyət və ictimaiyyət nümayəndələri ilə görüşündə həmin mesajı təkrar vurğulayıb. ABŞ heç Yaxın Şərqdə də inqilab etmək istəmir. Bununla bağlı səsləndirilən ittiham əsassızdır”.
ABŞ səfirliyinin İctimai Palatanın aprelin 2-də Bakıda keçirdiyi mitinqlə bağlı bəyanat verdiyini xatırladan Kis Bin bildirib ki, həmin bəyanat səfirliyin rəsmi internet səhifəsində qalır: “Bizim mövqeyimiz dəyişməyib. ABŞ səfirliyi hesab edir ki, ölkədə toplaşmaq azadlığı təmin olunmalıdır. Biz nümayişlərə görə saxlanılanları qanuni proseduralarla, açıq və şəffaf dinləmələr və müvafiq hüquq məsləhətçisi xidmətinə çıxışla təmin etməyə də çağırırıq”.
/// bizimyol qəzeti
