Xəbər verdiyimiz kimi, Prezident İlham Əliyev Azərbaycan və Mərkəzi Asiya Dövlət Başçıları arasında 8-ci Məşvərət Görüşündə çıxışı zamanı ölkəmizlə Mərkəzi Asiya dövlətləri arasında iqtisadi əlaqələrin inkişafından danışıb.
Dövlət başçısı hazırda Azərbaycanda Mərkəzi Asiya ölkələrinin kapitalı ilə 400-dən çox şirkətin fəaliyyət göstərdiyini bildirib. Prezident, həmçinin Azərbaycan, Qazaxıstan, Özbəkistan və Qırğızıstan arasında birgə investisiya fondlarının yaradıldığını və bu fondların hər birinin kapitalının yüz milyonlarla dollar təşkil etdiyini qeyd edib.
Mövzu ilə bağlı AZXEBER.COM-a danışan iqtisadçı Xalid Kərimli bildirib ki, Azərbaycanın Mərkəzi Asiya ilə iqtisadi inteqrasiyasının dərinləşməsi ölkənin strateji maraqlarına uyğundur:
"Azərbaycanın Mərkəzi Asiya ilə inteqrasiyasının dərinləşməsi ölkəmizin strateji inkişaf proqramına uyğundur. Azərbaycan təkcə Mərkəzi Asiya ölkələri ilə siyasi-diplomatik müstəvidə əlaqələrini inkişaf etdirmir, eyni zamanda iqtisadi, ticarət və tranzit imkanları baxımından da bu ölkələrlə daha sıx əməkdaşlıq edir. Yəni bu istiqamətdə inteqrasiya daha da dərinləşib. İkinci məsələ Azərbaycanın Mərkəzi Asiya ilə enerji əməkdaşlığıdır. Həm Mərkəzi Asiya ölkələri, həm də Azərbaycan enerji resurslarına malik ölkələrdir. Bu baxımdan Azərbaycanın böyük infrastrukturu, o cümlədən qaz, neft və nəqliyyat infrastrukturu Azərbaycanla Mərkəzi Asiya arasında enerji sahəsində əməkdaşlığın daha da genişləndirilməsinə imkan verir. Mərkəzi Asiya enerji resurslarının Azərbaycan üzərindən dünya bazarına çıxarılması həm bu ölkələrin iqtisadi müstəqilliyinin təmin edilməsi, həm alternativ nəqliyyat kanallarının müəyyənləşdirilməsi, həm də Azərbaycanın tranzit imkanlarının genişləndirilməsi baxımından mühüm əhəmiyyət kəsb edir”.
X. Kərimlinin sözlərinə görə, qarşılıqlı kapital qoyuluşlarının artırılması da Azərbaycan və Mərkəzi Asiya ölkələri arasında iqtisadi əlaqələrin inkişafına ciddi təsir göstərə bilər:
"Bundan başqa, qarşılıqlı kapital hərəkəti də mühüm məsələdir. Azərbaycanın bu ölkələrə investisiya yatırması, eyni zamanda Mərkəzi Asiya ölkələrinin Azərbaycana investisiya yatırması hər iki istiqamətdə faydalı nəticələr verə bilər. Azərbaycanın Mərkəzi Asiyanın bəzi ölkələrində, xüsusilə Özbəkistanda yaratdığı sənaye kooperasiyalarının və birgə müəssisələrin genişləndirilməsi də qarşılıqlı maraq doğurur. Eyni zamanda, sənaye layihələri, birgə investisiya fondları, kənd təsərrüfatı layihələri və digər istiqamətlər üzrə əməkdaşlığın genişləndirilməsi məsələləri də müzakirə olunur”.
İqtisadçı qeyd edib ki, Azərbaycanın Mərkəzi Asiya ilə iqtisadi əlaqələri xüsusilə son illərdə yeni mərhələyə keçib:
"Təbii ki, hazırda bizim Mərkəzi Asiya ilə əlaqələrimiz genişlənir. Baxmayaraq ki, Sovet dövründə bir məkanda, vahid iqtisadi sistem daxilində olmuşuq, sonrakı dövrdə iqtisadi və ticarət əlaqələrinin inkişafı daha sürətli xarakter alıb. Bu proses xüsusilə 2021-ci ildən etibarən yeni impuls alıb. Qarabağ müharibəsindən sonra Azərbaycanın ərazi bütövlüyünün bərpası, ölkəmizin iqtisadi maraq mərkəzinə çevrilməsi və Mərkəzi Asiya ölkələrinin sürətli inkişafı bu əlaqələrin genişlənməsinə təsir edən əsas amillərdəndir”.
Fəridə Əsədzadə
