"Rəqəmsal məktəb" platformasının əhatə dairəsi və tədris prosesinə süni intellekt texnologiyalarının tətbiqi genişləndirilir.
AZXEBER.COM xəbər verir ki, bunu elm və təhsil naziri Emin Əmrullayev 2026-2027-ci tədris ilinə dair keçirilən mətbuat konfransı zamanı deyib.
"Rəqəmsal məktəb" platforması artıq Bakı ilə yanaşı Gəncə, Sumqayıt, Naxçıvan, Mingəçevir və Abşeron olmaqla daha 5 şəhər və rayonu əhatə edir. Layihə çərçivəsində əhatə olunan məktəblərin sayı 349-dan 550-dən çoxa çatdırılıb. Ötən tədris ilində direktor, müəllim, şagird və valideynlər də daxil olmaqla platformadan 900 mindən çox istifadəçi yararlanıb.
Eyni zamanda, təlim prosesində süni intellekt həllərinin tətbiqi genişləndirilir. 44 mindən çox təhsilverən üçün "Microsoft Copilot", "Google Gemini" və "NotebookLM" kimi Sİ alətləri istifadəyə verilib. Bu texnologiyalar müəllimlər üçün tədris materiallarının hazırlanması, dərsin planlaşdırılması, qiymətləndirmə meyarlarının təyini və rəqəmsal məzmun yaradılmasında böyük imkanlar açır. Şagirdlər üçün isə dərslik üzrə sualları cavablandıran və tapşırıqlarda adaptiv dəstək göstərən rəqəmsal köməkçi tətbiq olunur.
Təhsil sahəsində yeniliklər çərçivəsində "OpenAI" şirkəti ilə adaptiv öyrənmə platforması üzrə əməkdaşlığa başlanılıb. Paralel olaraq, kağız jurnallar mərhələli şəkildə ləğv edilərək kargüzarlıq tam elektronlaşdırılıb.
Şahanə
