50 yaşdan sonra orqanizmdə müəyyən dəyişikliklər baş verir. Maddələr mübadiləsi zəifləyir, ürək-damar xəstəlikləri və yaddaş problemləri riski artır. Bu səbəbdən gündəlik vərdişlər daha böyük əhəmiyyət kəsb edir. Mütəxəssislər bildirirlər ki, düzgün və ölçülü şəkildə istifadə edildikdə qəhvə bu yaşdan sonra sağlam həyat tərzinin vacib hissəsinə çevrilə bilər.
AZXEBER.COM xəbər verir ki, araşdırmalara görə qəhvə ilk növbədə beyin fəaliyyətinə müsbət təsir edir.
Tərkibindəki kofein mərkəzi sinir sistemini stimullaşdıraraq yaddaşı və diqqəti dəstəkləyir. Bu da yaşla bağlı yaranan koqnitiv zəifləmələrin qarşısını müəyyən dərəcədə almağa kömək edə bilər. Eyni zamanda qəhvə güclü antioksidant mənbəyi hesab olunur. Bu maddələr hüceyrələrin qocalmasını sürətləndirən oksidləşdirici stresslə mübarizə aparır və orqanizmin ümumi müdafiə qabiliyyətini artırır.
Mütəxəssislər qeyd edirlər ki, qəhvənin ürək-damar sisteminə də müsbət təsiri ola bilər. Ölçülü qəbul edildikdə damarların vəziyyətini yaxşılaşdıra və bəzi ürək xəstəliklərinin riskini azalda bilər. Lakin burada əsas şərt miqdara nəzarət etməkdir.
Qəhvə həmçinin maddələr mübadiləsini aktivləşdirərək orqanizmin enerjidən daha səmərəli istifadə etməsinə kömək edir. Bu xüsusilə metabolizmin zəiflədiyi 50 yaşdan sonra daha önəmli hesab olunur. Araşdırmalar göstərir ki, müntəzəm qəhvə istehlakı 2-ci tip diabet, bəzi qaraciyər xəstəlikləri və müəyyən onkoloji risklərin azalması ilə də əlaqələndirilir.
Bununla belə, mütəxəssislər qəhvənin düzgün istifadəsinin vacibliyini vurğulayır. Ən yaxşı seçim şəkərsiz, təbii qara qəhvədir. Gündə 1-3 fincan arasında içilməsi optimal sayılır. Axşam saatlarında qəhvə qəbul etmək yuxuya mənfi təsir göstərə bilər. Əgər insanın təzyiq və ya ürəklə bağlı problemi varsa, qəhvə istifadəsi mütləq həkimlə məsləhətləşdirilməlidir.
Beləliklə, qəhvə düzgün istifadə edildikdə 50 yaşdan sonra həm fiziki, həm də zehni sağlamlığın qorunmasına kömək edən sadə, lakin təsirli vərdişlərdən biri ola bilər.
/Lent.az
