Dəri xərçənginin təhlükəli növlərindən olan melanomanın müalicəsində mühüm irəliləyiş əldə edilib. Fərdiləşdirilmiş mRNA peyvəndi klinik sınaqların üçüncü mərhələsində xəstəliyin təkrarlanması və ya ölüm riskini 42 faiz azaldıb.
AZXEBER.COM xarici mətbuata istinadən xəbər verir ki, Moderna və Merck şirkətlərinin hazırladığı peyvənd əməliyyatdan sonra melanomanın yenidən yaranmasının qarşısını almaq üçün nəzərdə tutulub. Müalicə xəstənin öz şişinin xüsusiyyətlərinə uyğun hazırlanır və immun sisteminə xərçəng hüceyrələrini tanıyaraq onlara hücum etməyə kömək edir.
Dünya üzrə 157 mərkəzdə 1100-dən çox xəstənin iştirak etdiyi sınaqlarda peyvəndin Keytruda adlı immunoterapiya preparatı ilə birlikdə istifadəsi araşdırılıb. Müalicəyə başladıqdan altı ay sonra xərçəngsiz qalan xəstələrdə riskin azalması 58 faizə çatıb.
Tədqiqatın nəticələri 2026-cı ildə Avropa Tibbi Onkologiya Cəmiyyətinin konqresində təqdim olunub. Mütəxəssislər bu yanaşmanın gələcəkdə digər xərçəng növlərinin müalicəsində də istifadə oluna biləcəyini düşünürlər.
Peyvənd hələ Avstraliya və ABŞ-da xəstələr üçün əlçatan deyil. Müalicənin geniş istifadəyə verilməsi üçün tənzimləyici qiymətləndirmə prosesi davam edir.
Qeyd edək ki, fərdiləşdirilmiş mRNA peyvəndləri xərçəngin qarşısının alınması üçün deyil, mövcud xəstəliyin müalicəsinə və təkrarlanma riskinin azaldılmasına yönəlib.
Gülay
