Xəbər verdiyimiz kimi, Bakı Ekspo Mərkəzində keçirilən kitab sərgisini ziyarət edən bir qadın sosial şəbəkə hesabında paylaşım edərək avtomobil dayanacağı üçün ödəniş tələb olunmasından narazılığını bildirib.
Vətəndaş qeyd edib ki, bazar günləri parklanmanın ödənişsiz olmasına baxmayaraq, Bakı Ekspo Mərkəzinin ərazisində avtomobilini bir saatdan az müddətə saxladığı üçün ondan 2 manat ödəniş tələb edilib.
Məsələ ilə bağlı AzParking-ə sorğu ünvanladıq.
Qurumdan AZXEBER.COM-a bildirilib ki, Bakı Ekspo Mərkəzinin ərazisindəki parklanma tariflərini mərkəzin özü müəyyən edir:
"Yerüstü küçə parklanması Azərbaycan Yerüstü Nəqliyyat Agentliyi (AYNA) tərəfindən təşkil olunur. Bu parklanma yerləri dövlət parklanması hesab olunur və tariflər Nazirlər Kabineti tərəfindən müəyyən edilir. AzParking isə burada yalnız mobil tətbiq vasitəsilə müasir ödəniş imkanları təqdim edən xidmət rolunu oynayır. Digər bölmədə qeyd olunan parklanma yerləri isə müvafiq ərazilərin öz səlahiyyətlərinə aid olan parklanma sahələridir. Məsələn, Bakı Ekspo Mərkəzinin ərazisindəki parklanma tariflərini mərkəzin özü müəyyən edir. Bu tariflər həmin ərazinin daxili qaydalarına uyğun tənzimlənir”.
AzParking-dən bildirilib ki, parklanma yerlərinin təşkilinin qurum tərəfindən həyata keçirildiyini demək düzgün deyil:
"Buna görə də parklanma yerlərinin təşkilinin AzParking tərəfindən həyata keçirildiyini demək düzgün deyil. AzParking yalnız mobil tətbiq vasitəsilə ödəniş imkanları təqdim edir. Küçə parklanması isə AYNA tərəfindən təşkil olunur və qanunvericiliyin 53-cü maddəsi ilə tənzimlənir”.
Qurum bazar günləri küçə parklanmasının ödənişsiz olduğunu xatırladıb:
"Qanunvericiliyə əsasən, küçə parklanmasında bazar günləri ödəniş tələb olunmur. Həmçinin, saat 22:00-dan səhər saat 07:00-dək parklanma ödənişsizdir. İlk 15 dəqiqə ərzində də ödəniş tələb edilmir”.
Fəridə Əsədzadə
