"Biz sovet dövründə də vahid məktəbli forması geyinərək məktəbə getmişik. İstəyirik ki, uşaqlarımız da eyni formada məktəbə getsinlər, qəbul olunmuş geyim qaydalarına əməl etsinlər və məktəbdə gözəl mühit yaradılsın”.
Bu sözləri AZXEBER.COM-a açıqlamasında Azərbaycan Bəstəkarlar İttifaqının sədri Firəngiz Əlizadə bildirib.
O deyib ki, azyaşlı qız uşaqlarına hicab geyindirilməsini təzyiq hesab edir:
"Təbii ki, altı-yeddi yaşlı qız uşağına hicab geyindirərək məktəbə göndərməyi mən təzyiq hesab edirəm. Amma uşaq məktəbi bitirdikdən sonra artıq öz seçimlərini edə bilər. Şəxsiyyəti formalaşdıqdan sonra hansı yolu seçirsə, bu, onun öz qərarıdır. Lakin məktəbdə, sinifdə digər şagirdlərlə eyni mühitdə təhsil alan uşaqların vahid geyim formasına əməl etməsi, diqqətlərini dərslərinə yönəltməsi vacibdir. Məktəbi bitirdikdən sonra isə kimsə başını örtməyi seçə bilər”.
Firəngiz Əlizadə başıörtülü xanımlarla bağlı münasibətini də açıqlayıb:
"Məsələn, bizim iki xanım üzvümüz var, hər ikisi başıörtülü xanımlardır. Onlardan biri bəstəkardır, digəri isə musiqişünasdır. Onların ailələri var və bu məsələdə heç bir problem görmürəm. Amma altı-yeddi yaşlı qız uşaqlarına hicab geyindirilməsinə rəva görmürəm”.
Fəridə Əsədzadə
