Xəbər verdiyimiz kimi, gələn ildən etibarən özəl sektorda çalışan şəxslər gəlir vergisinə cəlb olunacaq.
Bu, "Azərbaycan Respublikasının 2026-cı il dövlət büdcəsi haqqında” qanun layihəsində öz əksini tapıb.
İqtisadçı Xalid Kərimli AZXEBER.COM-a bildirib ki, 2026-cı il yanvarın 1-dən etibarən gəlir vergisi ilə əlaqədar qeyri-dövlət, yəni özəl sektorda çalışanlar üçün tətbiq edilən vergi güzəştinin müddəti başa çatır:
"Hökumət bu prosesi dərhal deyil, mərhələli şəkildə həyata keçirəcək. Belə ki, vətəndaşın iş yerində aylıq gəliri 2500 manata qədərdirsə, ondan 3 faiz (yəni 75 manat) gəlir vergisi tutulacaq. 2500 manatdan 8000 manata qədər olan gəlirdən isə 10 faiz, 8000 manatdan yuxarı maaş alan şəxslərdən isə 14 faiz vergi çıxılacaq. Nəticə etibarilə, 8000 manatdan çox əməkhaqqı alan şəxslər 625 manat və əlavə olaraq gəlirin həmin hissəsindən 14 faiz vergi ödəyəcəklər. Bu qayda 2026-cı ildən etibarən bir illik dövrü əhatə edir”.
Ekspert deyib ki, 2027-ci ildən etibarən isə aşağı gəlir həddində olan şəxslər üçün vergi 2 faiz artırılaraq 5 faiz olacaq:
"2028-ci ildən sonra isə özəl sektorda 2500 manata qədər maaş alan şəxslər üçün gəlir vergisi 7 faiz təşkil edəcək. Digər gəlir aralıqları əvvəlki illərdə olduğu kimi qalacaq.
Beləliklə, hökumət üçpilləli sistemlə maaşlardan tutulan gəlir vergisini mərhələli şəkildə bərpa edir. Əsas məqam ondan ibarətdir ki, 2500 manat maaş alan vətəndaş əvvəllər 14 faiz vergi ödəyirdisə, yeni qaydalara görə bu göstərici əlavə 3 faiz olacaq. Lakin onun Dövlət Sosial Müdafiə Fonduna (pensiya fonduna) olan 10 faizlik ödənişi əvvəlki qaydada qalacaq. Hökumətin əsas məqsədi vətəndaş pensiyaya çıxarkən onun pensiya kapitalının formalaşması üçün sosial sığorta ödənişlərinin saxlanılmasını təmin etməkdir”.
X.Kərimli qeyd edib ki, bununla belə, bu proses insanların alım gücünü azaldacaq:
"Dövlət vətəndaşın qazancının bir hissəsini büdcəyə yönəldir və özü xərcləyəcəyini bildirir. Nəticədə, vətəndaşın alım gücü aşağı düşəcək, dövlətin isə maliyyə imkanları genişlənəcək. Bu vergi artımını heç bir şəkildə kompensasiya etmək mümkün olmayacaq. Vətəndaş özü öz başının çarəsinə baxmalıdır”.
Şahanə Ziyad
