Səhhətində problemlər yaşanan müğənni Rəqsanə İsmayılovanın Siyəzən rayonunun “Zarat” ərazisində yerləşən polis postunda döyülməsi və aprelin 20-də xəstəxanaya aparılması haqda mətbuatda yazılar dərc olunub.
Xatırladaq ki, aprelin 17-də müğənni, sürücüsü və köməkçisi ilə yol polisləri arasında yaşanan münaqişə videorolikdə əks olunub.
Dünən müğənni ilə əlaqə saxlayıb səhhəti ilə maraqlandıq. Lakin mobil telefonu bağlı oldu. Köməkçisi Təranə Səmədova bildirdi ki, müğənniyə o qədər telefon zəngləri, təzyiqlər və təhdidlər olur ki, o, telefonunu bağlamaq məcburiyyətində qalıb: “Bizdən tələb edirlər ki, bu məsələni çox qabartmayaq. Məlumatımız var ki, qarşı tərəf də məsələnin sülh yolu ilə həll olunmasını istəyir. Ola bilər ki, biz şikayət ərizəsini geri götürdük. Mümkünsə, bu mövzuda danışmayaq...”.
Hazırda müğənninin səhhətinin qayğıya ehtiyacı olduğunu vurğulayan T.Səmədova R.İsmaylovanın gərgin durumda olduğunu bildirdi: “Rəqsanə xəstəxanada qalmaqdan da imtina etdi. Onu ”Semaşko"ya apardılar, həkimlərdən izn alıb evə gəldi".
Qeyd edək ki, Baş Dövlət Yol Polisinin ictimaiyyətlə əlaqələr şöbəsinin rəisi Kamran Əliyev day.az-a bildirib ki, hadisə ilə əlaqədar döyülmək iddiaları əsassızdır: “Axı harada görünüb ki, Dövlət Yol Polisinin əməkdaşı qadına əl qaldırsın?!” // musavat.com
