Bu gün Bakı Dövlət Universitetində Azərbaycan-Koreya İnformasiya təminatı Mərkəzinin yenidənqurulmadan sonrakı açılış mərasimi keçirilib. Açılış mərasimində çıxış edən Bakı Dövlət Universitetinin rektoru, akademik Abel Məhərrəmov 2008-ci ilin dekabrın 17-də açılmış Azərbaycan-Koreya İnformasiya təminatı Mərkəzinin Azərbaycan Dövləti ilə Cənubi Koreya Dövlətinin dostluğunun bir rəmzi olduğunu deyib. BDU-dan AZXEBER.COM-a verilən məlumata görə, mərkəz haqqında tədbir iştirakçılarına məlumat verən rektor, 3 otaqdan ibarət olan Azərbaycan-Koreya İnformasiya təminatı Mərkəzində Seminar otağı, İnformasiya – Kommunikasiya Texnologiyaları üzrə Treninq Laboratoriyası və İnternet zalının fəaliyyət göstərdiyini vurğulayıb. O, bildirib ki, İnformasiya – Kommunikasiya Texnologiyaları üzrə Treninq Laboratoriyası 75 ədəd kompüter və iki genişekranlı proyektor ilə təchiz olunub. İnternet zalı isə öz növbəsində tələbələrin və tədqiqatla məşğul olan şəxslərin internet vasitəsilə lazımi məlumatları əldə etmələri məqsədinə xidmət edir. Rektorun sözlərindən o da məlum olub ki, Azərbaycan-Koreya İnformasiya təminatı Mərkəzində Beynəlxalq konfranslar və seminarlar keçirilir. Məsələn, BMT tərəfindən maliyyələşdirilən Beynəlxalq İqtisadiyyat Universiteti ildə bir dəfə bir həftəlik İqtisadiyyat üzrə Beynəlxalq konfransı bu mərkəzdə keçirir. Eyni zamanda bu mərkəzdə Rusiyadan, Ukraynadan, Türkiyədən və s. dəvət olunan alimlərin də seminarları təşkil olunur. Bunlarla yanaşı olaraq hər həftə proqramlaşdırma dillərinə və İnternet texnologiyalarına daha mükəmməl yiyələnmək üçün bu mərkəzdə tələbələrin və müəllimlərin seminarları keçirilir. Həmçinin Azərbaycan-Koreya İnformasiya təminatı Mərkəzində elmi ad almaq üçün dissertant və doktorantların müdafiəsi də təşkil olunur və onlar müdafiə zamanı müasir kompüter avadanlıqlarından istifadə edirlər. Bakı Dövlət Universiteti ilə Cənubi Koreya Universitetləri arasında elmi və təhsil sahəsindəki əməkdaşlığın gün-gündən genişləndiyini deyən akademik, Tətbiqi riyaziyyat fakültəsinin bir çox tələbələrinin Cənubi Koreyanın KAİST Universitetində təhsillərini müvəffəqiyyətlə davam etdirdiklərini xatırladıb. Qeyd edək ki, yenidənqurulmadan sonra mərkəz 30 ən müasir kompüterlə təmin olunub. Təmir və təchizat işləri isə əvəzsiz olaraq (BDU tərəfindən vəsait ödənilmədən) həyata keçirilib. Öz çıxışında Koreya Respublikasının Dövlət İdarəçiliyi və Təhlükəsizlik Nazirinin müavini cənab Seo Pil Eon Azərbaycanın ən nüfuzlu universiteti olan Bakı Dövlət Universitetində Azərbaycan-Koreya İnformasiya təminatı Mərkəzinin yenidənqurulmadan sonrakı açılış mərasimində iştirakından qürur duyduğunu deyib. Qonaq bu mərkəzin Azərbaycanın informasiya texnologiyaları sahəsində inkişafına dəstək verəcəyini bildirib. Xatırladaq ki, açılış mərasimində Koreya Respublikası tərəfindən İnformasiya texnologiyalarının yayılmasının planlaşdırılması və əlaqələndirilməsi şöbəsinin müdiri cənab Ryu İm Çul, Beynəlxalq İnzibati İnkişaf Mərkəzinin müdiri cənab Ko Vung Coi, İnformasiya texnologiyalarının yayılmasının planlaşdırılması və əlaqələndirilməsi şöbəsinin müdir müavini cənab Park Cin So, İnformasiya texnologiyalarının yayılmasının planlaşdırılması və əlaqələndirilməsi şöbəsinin köməkçi direktoru xanım Kvak Bo Hyun, Koreya Respublikasının Azərbaycan Respublikasındakı Fövqəladə və Səlahiyyətli səfiri cənab Lee Ci Ha, Azərbaycan Respublikası tərəfindən isə Azərbaycan Respublikası Rabitə və İnformasiya Texnologiyaları Nazirinin müavini cənab Elmir Vəlizadə, Bakı Dövlət Universitetinin prorektorları və müəllim-professor heyəti iştirak ediblər.
