Oktyabrın 1-də ABŞ-Azərbaycan Ticarət Palatasının (USACC) İcraçı Direktoru Natiq Baxışovun iştirakı ilə işgüzar səhər yeməyi keçirilib.
AZXEBER.COM xəbər verir ki, görüşdə Marsol Group və İş Adamları Cəmiyyətinin Milli Assosiasiyasının (İCMA) üzvü olan, istehsal və ixracla məşğul olan, eləcə də beynəlxalq bazarlara çıxış imkanları ilə maraqlanan şirkət rəhbərləri iştirak ediblər.
Görüş zamanı Azərbaycan və ABŞ arasında biznes əlaqələrinin inkişaf perspektivləri, yerli sahibkarların ABŞ bazarına çıxış imkanları, ixrac potensialı və iki ölkənin biznes nümayəndələri arasında qarşılıqlı əməkdaşlığın genişləndirilməsi məsələləri ətrafında fikir mübadiləsi aparılıb.
ABŞ-Azərbaycan Ticarət Palatasının İcraçı Direktoru Natiq Baxışov çıxışında ABŞ bazarının xüsusiyyətləri, Azərbaycan şirkətləri üçün mövcud əməkdaşlıq imkanları və iki ölkənin biznes icmaları arasında əlaqələrin inkişaf etdirilməsi istiqamətində görülən işlər barədə məlumat verib. O, Azərbaycan şirkətlərinin beynəlxalq bazarlara çıxışının genişləndirilməsi üçün biznes əlaqələrinin və birbaşa əməkdaşlıqların inkişaf etdirilməsinin əhəmiyyətini vurğulayıb.
Görüşdə çıxış edən İş Adamları Cəmiyyətinin Milli Assosiasiyasının (İCMA) İdarə Heyətinin sədri və Marsol Group-un təsisçisi Tural Mustafayev Marsol Group-un fəaliyyəti, sahibkarlığın inkişafı istiqamətində həyata keçirilən layihələr və biznes icmasının dəstəklənməsi məqsədilə görülən işlər haqqında ətraflı məlumat verib.
Sonda iştirakçılar arasında gələcək əməkdaşlıq istiqamətləri və birgə layihələrin həyata keçirilməsi imkanları müzakirə olunub.
