"Hazırda ABŞ ilə birbaşa danışıqlar aparmırıq, lakin vasitəçilər vasitəsilə mesajlar mübadiləsi həyata keçirilir”.
AZXEBER.COM "Press TV”yə istinadən xəbər verir ki, bunu İranın xarici işlər naziri Abbas Əraqçi ABŞ ilə münasibətlərdə son vəziyyəti şərh edərkən deyib.
Əraqçinin sözlərinə görə, bəzi ölkələr Tehran və Vaşinqton arasında danışıqların yenidən başlaması üçün zəmin yaratmağa çalışır. Lakin İran bunun üçün müəyyən şərtlərin yerinə yetirilməsini tələb edir.
"Bəzi ölkələr hələ də yenilənmiş danışıqlar üçün yol açmaq üzərində işləyirlər. Lakin ABŞ İslamabad Anlaşma Memorandumunu pozmasına son qoyana və törətdiyi pozuntuları kompensasiya etmək üçün addımlar atana qədər danışıqlar bərpa edilə bilməz”, - deyə Əraqçi bildirib.
İranlı nazir Omanla aparılan danışıqlara da toxunub. Onun sözlərinə görə, Tehran və Məsqət arasında müzakirələr Hörmüz boğazından yeni dəniz marşrutunun yaradılması ilə bağlıdır.
"Omanla danışıqlarımız Hörmüz boğazından yeni dəniz marşrutunun yaradılması ilə bağlıdır. Mövcud marşrutlar yeniləri ilə əvəz olunacaq”, - Əraqçi deyib.
Nazir Omanla aparılan danışıqların Hörmüz boğazının avtomatik olaraq yenidən açılması anlamına gəlmədiyini vurğulayıb.
"Omanla danışıqlar Hörmüz boğazının yenidən açılacağı demək deyil. Razılıq əldə edilə bilər, lakin boğazın yenidən açılması vasitəçilər vasitəsilə çatdırılan digər şərtlərdən asılıdır”, - deyə Əraqçi qeyd edib.
