ABŞ Prezidenti Donald Tramp administrasiyası İran Prezidenti Məsud Pezeşkian və xarici işlər naziri Abbas Arakçının Nyu Yorkda keçiriləcək BMT Baş Assambleyasının Yüksək Səviyyəli Həftəsində iştirak etmələri üçün vizaları təsdiqləyib. Bu barədə ABŞ Dövlət Departamenti məlumat yayıb. Bildirilib ki, vizalar həm İranın əsas nümayəndə heyətinə, həm də onların fəaliyyəti üçün zəruri hesab edilən müşayiətçi heyətə verilib.
Politoloq Sədrəddin Soltan AZXEBER.COM-a açıqlamasında deyib ki, bu, İranın çağdaş tarixində ilk hal deyil:
"BMT Baş Assambleyasının növbəti sessiyasında İranın nümayəndə heyətinin, yəni Prezident Məsud Pezeşkianın və xarici işlər naziri Abbas Arakçının iştirak etməsi gözlənilir. Bu, İranın çağdaş tarixində ilk hal deyil. Çünki ondan əvvəl Həsən Ruhaniyə, Məhəmməd Xatəmiyə və Mahmud Əhmədinejada da BMT Baş Assambleyasının sessiyasında iştirak etmək üçün ABŞ tərəfindən viza verilmişdir. Əvvəlki prezidentlərin Nyu-Yorka səfəri zamanı ABŞ rəsmiləri onlarla görüşmüşdü. Hətta Məhəmməd Xatəmi ilə görüşməyə cəhdlər olub. Eyni zamanda ABŞ-nin keçmiş prezidenti Bill Klinton Baş Assambleyasının toplantısında o vaxtkı İran Prezidenti Məhəmməd Hatəminin nitqinə qulaq asmaq üçün gəlib”.
O qeyd edib ki, görüşlərin ABŞ-İran münasibətlərinin normallaşması üçün hər hansı müsbət təsiri olacağı ehtimalı çox azdır:
"Sadəcə olaraq, indiki şərait əvvəlkilərdən fərqlənir. Çünki bu sessiyada İran nümayəndəliyi ABŞ ilə münasibətlərin gərgin olduğu bir vəziyyətdə iştirak edir. Onlar BMT kürsüsündən imkan daxilində mövcud vəziyyəti çatdırmağa çalışacaqlar. İndiki şəraitdə də ehtimal etmək olar ki, ABŞ Dövlət Departamentinin əməkdaşları, yaxud başqa qurumun təmsilçiləri Məsud Pezeşkian və Abbas Əraqçi ilə görüşməyə cəhd etsinlər.
Belə bir görüşün ABŞ-İran münasibətlərinin normallaşması üçün hər hansı müsbət təsiri olacağı ehtimalı çox az olar. Sadəcə olaraq, bu, münasibətlərin vəziyyətini BMT tribunasından dünya dövlətlərinə çatdırmaq üçün imkan yaranacaq. Toplantı çərçivəsində, ABŞ və İran nümayəndələri arasında təmas olarsa, bunu tərəflər arasında münasibətlərin normallaşması istiqamətində müəyyən uğurlu addımların atılması kimi qiymətləndirmək olar”.
Qeyd edək ki, BMT Baş Assambleyasının 81-ci sessiyası sentyabrın 8-də Nyu Yorkda öz işinə başlayıb. Yüksək Səviyyəli Liderlər sammiti həftəsi isə sentyabrın 22-də start götürəcək.
Şahanə Ziyad
