ABŞ, Ukrayna, Avropa ölkələri və NATO nümayəndələri Ukraynadakı müharibənin qış mövsümü başlamazdan əvvəl dayandırılması imkanlarını müzakirə ediblər.
Bu barədə ABŞ Prezidentinin xüsusi nümayəndəsi Stiv Uitkoff "X” sosial şəbəkəsində məlumat yayıb.
Onun sözlərinə görə, oktyabrın 9-da Mayamidə keçirilən görüşdə ABŞ, Ukrayna, Böyük Britaniya, Fransa, Almaniya, Avropa Komissiyası və NATO nümayəndələri iştirak ediblər.
Danışıqlarda Ukrayna münaqişəsində gərginliyin azaldılması, hərbi əməliyyatların qış mövsümünə qədər dayandırılması və davamlı sülhə nail olunması yolları nəzərdən keçirilib.
"Mayamidə Ukrayna münaqişəsinin qış başlamazdan əvvəl deeskalasiyası və dayandırılmasının mümkün yolları, eləcə də möhkəm və uzunmüddətli sülhə nail olmaq istiqamətində səylərin irəlilədilməsi ilə bağlı konstruktiv danışıqlar aparılıb”, – Uitkoff bildirib.
ABŞ rəsmisi görüşün nəticələri üzrə konkret razılaşmanın əldə edilib-edilmədiyini açıqlamayıb.
///teleqraf///
