ABŞ Dövlət Katibi Marko Rubio ABŞ və İran arasında mümkün razılaşma üzrə danışıqların davam etdiyini və bu gün mühüm inkişafın baş verə biləcəyini açıqlayıb.
AZXEBER.COM xarici mətbuata istinadən xəbər verir ki, Hindistanın paytaxtı Yeni Dehli şəhərində jurnalistlərə danışan Rubio bildirib ki, tərəflər arasında müzakirələr hələ də davam edir. Onun sözlərinə görə, dünən gecə müəyyən irəliləyiş gözlənilsə də, proses yekunlaşmayıb.
"Dünən gecə bir inkişaf olacağını düşündük”, – deyən ABŞ Dövlət Katibi əlavə edib ki, Vaşinqton və Tehran arasında mümkün razılaşma ilə bağlı gün ərzində yeni xəbərlər ola bilər.
Rubio qeyd edib ki, Hörmüz boğazının yenidən açılması məsələsi və nüvə danışıqları gündəmdədir. O, diplomatik səylərin nəticə verəcəyinə ümid etdiyini vurğulayıb.
ABŞ Prezidenti Donald Tramp administrasiyasının "pis razılaşma”ya getməyəcəyini bildirən Rubio, Vaşinqtonun diplomatiyanın uğur qazanması üçün bütün imkanlardan istifadə etdiyini deyib.
Xatırladaq ki, Rubio dünən Hindistanın xarici işlər naziri Subrahmanyam Cayşankar ilə görüşdən sonra İran və Hörmüz boğazı ilə bağlı yeni açıqlamaların günün sonuna qədər verilə biləcəyini bildirmişdi.
ABŞ Dövlət Katibi İranla razılaşma istiqamətində "ciddi irəliləyiş” əldə olunduğunu desə də, hələlik yekun qərarın qəbul edilmədiyini vurğulayıb.
Gülay
