Abonentlər hansı mobil operatoru boykota etməyə çağırdı?
Azərbaycanda mobil rabitə istifadəçilərinin ən çox şikayətləndiyi mobil operator müəyyənləşib.
AZXEBER.COM xəbər portalının 20 min 600 nəfərlik rəsmi “facebook” səhifəsində “Azərbaycanda ən pis çalışan, abunəçiləri aldadan mobil operator hansıdır?” sorğusu yekunlaşıb.
Sorğuda 2000-ə yaxın insan iştirak edib. Sorğuda iştirak edən mobil telefon istifadəçilərinin fikrincə, “Azərbaycanda ən pis çalışan, abunəçiləri aldadan mobil operator” 43 %-lə “Azercell Telecom” olub. İkinci yeri 37%-lə “Bakcell” tutub. “Facebook” istifadəçilərinin 20%-i isə “Nar Mobile”ni ən pis adlandırıb.
Bundan başqa mobil operatorların bu qədər yüksək danışıq tariflərinin qarşılığında abunəçilərə göstərdiyi xidmətlərin keyfiyyəti barədə isə elə, həmin abonentlərin özləri sorğumuzda fikirlərini bildiriblər.
“Jasmin” adlı “facebook” istifadəçisi bütün mobil operatorlardan şikayətlənib: “Elə bütün mobil operatorlar xalqı aldadır, hərəsi bir tariflə camaatın başını qatır, əvəzində isə külli miqdarda pul qazanır. Ümumiyyətlə, Azərbaycanda mobil operator qiymətləri çox bahadır. Qonşu Gürcüstanda bütün dünya ölkələrinə 2 sms bizim pulla 1 qəpik edir, 1 gb internet trafiki cəmi 10 manatdır. Amma “Azercell”də 1 gb internet paketi bundan 4 dəfə çox 41 manatdır”.
Əziz Tacəddinov isə maraqlı təkliflə çıxış edib: “Mən təklif edirəm ki, 1 ay bütün istifadəçilər kontur almasın. Əminəm ki, bundan sonra bütün mobil operatorlar ayağlarımıza qapanacaqlar. Ən əsası isə qiymətləri aşağı salacaqlar. Bu işdə "Azercell"dən başlamaq lazımdır. Çünki əhalini ən çox aldadan məhz "Azercell"dir”.
Gündüz Novruzov isə “Azercell”dən gələn mesajlardan təngə gəldiyini deyir: “Dünən “Azercell”dən mesaj gəlib ki, "Putinin hormonu dəyişib, görmək istəyərdin? - 0.50 AZN". Mən bilmirəm Putinin mənə və “Azercell”ə nə dəxli var. 50 qəpiyə görə istifadəçiləri belə təhqir etmək olmaz”.
Qeyd edək ki, son illərdə ölkəmizdə fəaliyyət göstərən mobil operatorlar danışıq tariflərində bir neçə dəfə endirim etsələr də, Azərbaycan hələ də MDB ölkələri arasında danışıq qiymətinin ən yüksək olduğu ölkə olaraq qalır.
