Azərbaycan milli komandasının baş məşqçi postuna yerli, yoxsa əcnəbi mütəxəssisin gətirilməli olması məsələsi gündəmdədir.
Mütəxəssislər və azarkeşlər arasında bu mövzuda fərqli fikirlər səslənir. Bir tərəf hesab edir ki, milli ruhu, futbolçuların mentalitetini yaxşı bilən yerli məşqçilərə güvənmək lazımdır. Digərləri isə düşünür ki, beynəlxalq təcrübəyə malik əcnəbi mütəxəssis daha peşəkar yanaşma sərgiləyə bilər.
Tanınmış idman eksperti Kənan Məstəliyev AZXEBER.COM-a bildirib ki, milli komandanın yeni baş məşqçisi mütləq yerli mütəxəssis olmalıdır:
"Artıq bu, fakt səviyyəsinə çatıb. Çünki indiyədək milli komandada işləyən heç bir əcnəbi məşqçi uğur qazana bilməyib. Onlar Azərbaycan futbolunun səviyyəsini, onun mahiyyətini, milli komandanın Azərbaycan üçün, azarkeşlər üçün nə demək olduğunu dərk etmirlər. Bu hissi başa düşmədikləri üçün də futbolçulara ötürə bilmirlər”.
K.Məstəliyev vurğulayıb ki, davamlı olaraq xarici məşqçilərə güvənildiyi üçün uğursuzluqlar təkrar olunur:
"Azərbaycan milli komandası yerli mütəxəssisə tapşırılmalıdır. Çünki milli komandada döyüşkən ruha ehtiyac var. İslandiyaya 0:5 hesabı ilə məğlubiyyətdən sonra Ukrayna ilə oyunda gördük ki, yerli məşqçi cəmi bir gündə futbolçuların mentalitetini dəyişə, onların damarını tutaraq maksimum nəticə ala bilər”.
Ekspert deyib ki, Azərbaycanda çox bacarıqlı, səviyyəli yerli mütəxəssislər var:
"Bunu dünən "Qarabağ”ın "Benfika” üzərindəki möhtəşəm qələbəsi ilə Qurban Qurbanov bir daha sübut etdi. Həmçinin Rəşad Sadıqov, Ayxan Abbasov kimi mütəxəssislərin də adını çəkmək olar. Rəşad Sadıqov uzun illər milli komandanın kapitanı olub, ən çox oyun keçirən futbolçudur və milli ruhu yaxşı anlayır. Bu hissi futbolçulara ötürmək gücünə sahibdir. Düşünürəm ki, AFFA daşı ətəyindən tökərək xarici məşqçi təcrübəsindən imtina etməli, yerli mütəxəssislərə üz tutmalıdır”.
Şahanə Ziyad
