""Qarabağ" maskotu ilə bağlı baş verənlər bir daha idman polisi mövzusunu gündəmə gətirir".
AZXEBER.COM xəbər verir ki, bu sözləri İTV-nin aparıcısı, tanınmış idman yazarı Ürfan Məmmədli sosial media hesabında yazıb.
Telaaparıcı qeyd edib ki, bir çox ölkəfə idman polisi faəliyyət göstərir və bu modeli Azərbaycanda da tətbiq etmək olar:
"İdman məkanlarında polislərlə azarkeşlər arasında yaşanan xoşagəlmək hallardan yola çıxaraq bu fəaliyyət istiqamətinin vacibliyini dəfələrlə qeyd etmişəm. Bu polislər idman tədbirindən geniş məlumatlı olur, oradakı obrazlardan, azarkeş yanaşmasından agah olur, şüarları öncədən bilir, klublarla sıx əməkdaşlıq edir. Təəssüflər olsun ki, bizdə olan indiki vəziyyət bəzən xoşagəlməz mənzərəyə yol açır.
Əslində, velosiped icad etməyəcəyik. Dünyanın bir sıra ölkələrində idman polisi(və ya futbol polisi) bölmələri var. Türkiyə, İtaliya, İspaniya, Fransa, B.Britaniya, Braziliya və Yunanıstanda nümunəsini görə bilərik.
Bundan əlavə, Almaniya, Polşa, Argentina, Meksika kimi ölkələrdə də stadion və idman təhlükəsizliyi üçün xüsusi polis bölmələri fəaliyyət göstərir, amma adları fərqli ola bilər".
Telejurnalistin bu statusuna Daxili İşlər Nazirliyinin (DİN) Mətbuat Xidməti İdarəsinin rəis müavini Zeyni Hüseynov reaksiya verib. Nazirliyin əməkdaşı mövzu ilə bağlı bu fikirləri bildirib:
"Məlumat üçün deyim ki, kütləvi, o cümlədən idman tədbirlərində ictimai asayişin qorunması, azarkeşlərin təhlükəsizliyinin təmin edilməsi və baş verə biləcək xoşagəlməz halların qarşısının alınması polis əməkdaşları tərəfindən tam icra olunur.
Buna misal olaraq indiyədək ölkəmizdə keçirilən beynəlxalq tədbirləri, idman yarışlarını göstərmək olar.
Müxtəlif idman yarışlarında, o cümlədən futbol oyunlarında xidmət aparan polis əməkdaşları yalnız təhlükəsizlik tədbirlərini icra etmir, həm də azarkeş davranışlarını öncədən təhlil edir, təşkilatçılar və klublarla sıx əməkdaşlıq qururlar.
Bu əməkdaşlıq nəticəsində stadion ətrafında və daxilində təhlükəsizlik, fan zonalarda isə asayiş təmin edilir".
Xatırladaq ki, "Qarabağ" klubunun maskotu "Kəhər"in UEFA Çempionlar Liqasının III təsnifat mərhələsinin cavab oyununda "Qarabağ" - "Şkendiya" matçı zamanı polislər tərəfindən stadiona buraxılmaması ilə bağlı sosial şəbəkələrdə xeyli videolar paylaşılıb.
