Deputat "Qarabağ"ın zəif çıxışını şərh etdi: "Klub hazırda keçid dövrünü yaşayır"

Ötən gün Avrokuboklarda yeganə təmsilçimiz "Qarabağ" klubu son oyununu keçirib.

 

Yunanıstanda "Olimpiakos"un qonağı olan Ağdam təmsilçisi 3-0 hesabı ilə məğlub olub.

 

Nəticədə, klub 8 oyundan sonra 3 xal qazanıb və 36 klub arasında sonuncu pillədə qərarlaşıb.

 

Beləliklə, klubun builki Avrokubok macərası bitib.

 

"Qarabağ"ın oyunu ilə bağlı maraqlı məqamlardan biri isə rəqibin 3 top vurmağına baxmayaraq bunlardan 2-ni künc zərbəsindən vurması olub.

 

Belə ki, "Köhlən atlar" əvvəlki qarşılaşmada da "Stiua" klubundan, eyni zamanda Azərbaycan Premyer Liqasında "Turan Tovuz"la matçda da künc zərbəsindən qol buraxmışdılar.

 

Bəs, "Qarabağ"ın cari mövsümdə Avroliqada zəif çıxış etməsinin səbəbləri nədir? Komandada ciddi dəyişikliklər gözləniləndirmi?

 

"Biz uzun illərdir ki, "Qarabağ" futbol klubunun qələbələrinə və nailiyyətlərinə alışmışıq, sevinmişik. "Qarabağ" adını həmişə idman arenasında, futbol dünyasında yaşadıb. Klub Ağdamda, Xankəndidə - işğaldan olan torpaqlarımız azad ediləndən sonra doğma meydançasında futbol oynamağa başladı. Lakin bu il təəssüflər olsun ki, "Qarabağ" klubu Avroliqada elə də yüksək səviyyədə təmsil olunmadı".

  

Deputat qeyd edib ki, "Qarabağ"ın Avroliqada zəif çıxış etməsinin bir neçə səbəbləri var:

 

"Bunun da müəyyən obyektiv və subyektiv səbəbləri var. İstənilən futbol klubu müvafiq keçid dövrünü mütləq yaşamalıdır. Mən inanıram ki, "Qarabağ" klubunda hazırda keçid dövrü yaşanır və biz bu komandaya yeni futbolçuların keçidini reallaşdırmalıyıq. Xüsusilə də azərbaycanlı gənc futbolçuların komandada təmsil olunmasını təmin etməliyik. Çünki futbol birbaşa maliyyə ilə bağlıdır. Ümid edirəm ki, "Qarabağ" klubu problemlərini həll edəcək, klub rəhbərliyi komandanın tam yaxşı oynaya bilməsi üçün, xeyli alternativ futbolçuların olması üçün transferlər həyata keçirəcək".

 

Millət vəkili "Qarabağ" azarkeşlərini klublarını sona qədər dəstəkləməyə çağırıb:

 

"İstənilən halda "Qarabağ" klubu udsa, uduzsa da həmişə bizim sevdiyimiz və dəstək verdiyimiz komandadır. Mən inanıram ki, növbəti Avrokuboklarda "Qarabağ" klubu əvvəlki şöhrətini geri qaytaracaq. Həqiqətən də gözoxşayan futbol oynamağa davam edəcəklər. Hazırda "Qarabağ" klubuna Premyer Liqada uğurlar arzulayırıq. Klub bu il də çempion olacaq. Mən bütün tamaşaçılarımızı "Qarabağ"ımızı sonuna qədər dəstəkləməyə çağırıram".