Tanınmış futbol veteranı Fazil Əsədov "Ölkə.Az"ın suallarını cavablandırıb.
AZXEBER.COM həmin müsahibəni təqdim edir:
- Fazil müəllim, hazırda Lənkəran futbolunun vəziyyəti necədir?
- Bildiyiniz kimi, "Xəzər Lənkəran" ölkə çempionatında çıxış etmir. Amma AFFA tərəfindən U-11, U12, U13, U-14 liqalarının oyunlarında Lənkəran komandaları da çıxış edir. Digər bölgələrdə olduğu kimi, Lənkəranda da bu işlər gedir.
- Siz bu yarışlarda hansı statusla iştirak edirsiniz? Məşqçisinizmi?
- Xeyr, sadəcə tamaşaçı kimi baxıram. Özüm idman məktəbinin direktoru olan vaxtda da gördüyümü deməyə çalışmışam. O vaxt yarışlar bizim meydançada keçirilirdi. Hazırda həftə ərzində 250-dən çox oyun keçirilir.
- Cənub futbolunun ən tanınmış simalarından olan Nazim Süleymanov yeni qurum yaratdı. O qurumda təmsil olunusunuzmu?
- Xeyr, təmsil olunmuram. Nazim müəllimə veteran futbolçu, Azərbaycanı təmsil etmiş insan kimi hörmətimiz var. Amma bu təşkilatın yaranmasının məqsədləri, arxasında kimlərin dayandığı mənə bəlli deyil. Hesab edirəm ki, belə bir təşkilata ehtiyac yoxdur.
- Nə mənada?
- Mən heç o təşkilatın adını bilmirəm. Onu bilirəm ki, Lənkəranda keçirilən iclaslarında cəmi üç nəfər iştirak etmişdi.
- Ola bilərmi ki, təşkilatın maliyyəsi zəif olduğu üçün maraq azdır, yaxud perspektivinə inanılmır?
- O haqda fikirləşməmişəm. Bir vaxtlar AFFA Nazim Süleymanov üçün hər şərait yaratmışdı, klublarda məşqçi işləyirdi.
- Deyəsən sosial şəbəkədə də bu barədə yazmışdınız...
- Bəli, AFFA onlara şərait yaradanda susmuşdular, indi danışmağa başlayıblar. Şəxsən mən 12 ildir ki, futboldan kənarda qalmışam.
