Bununla bağlı Siyasi Şurasının verdiyi bəyanatda bildirilib ki, AMİP İctimai Palatanın yaranmasının təşəbbüskarı və təsisçilərindən biridir. İctimai Palatanın yaranması zamanı qarşısına qoyduğu əsas məqsəd cəmiyyətə alternativ fikrin təqdim olunması, alternativ layihələr hazırlamaqla ictimaiyyətin təşkilatlanması və nəticədə hakimiyyətə alternativ gücün təqdim olunmasından ibarət idi: “ Ötən müddət ərzində komissiyaların yaradılması, regionlarda təşkilatlanma işinin əsas prioritet olması ilə bağlı Koordinasiya Şurası iclasında partiya sədri tərəfindən dəfələrlə fikirlər səsləndirilib.
Partiya olaraq mövqeyimiz hakimiyyətə müxalif olan əksər siyasi partiyaların, ictimai birliklərin, bitərəf ziyalıların birgə fəaliyyətinin təmin olunmasından ibarət olub.
Lakin çox təəssüflər olsun ki, keçən müddət ərzində İctimai Palata yarandığı zaman qarşısına qoyduğu məqsədlər istiqamətində fəaliyyətdən yayınaraq, yalnız mitinqlərin keçirilməsi ilə bağlı fəaliyyət göstərib. Nəticədə müxalifətin daha geniş spektrinin bir yerdə olmasının qarşısı alınıb, regional təşkilatlanma işi arxa plana keçirilib, bitərəflərin cəlb olunması istiqamətində əməli fəaliyyət göstərilməyib.
Hədəf olaraq ancaq razılaşdırılmamış məkanlarda mitinqlərin keçirilməsi əsas götürülüb. Bu isə öz növbəsində hakimiyyətin repressiv addımlar atması, onlarla müxalifət fəallarının həbsi, döyülməsi ilə nəticələnib, cəmiyyətdə olan etirazın səngiməsinə səbəb olub. 17 aprel tarixində keçirilmiş aksiyanın 2 aprellə müqayisədə daha az saylı olması isə birbaşa bunun nəticəsi kimi qiymətləndirilməlidir”.
AMİP Siyasi Şurası bütün bunları əsas gətirərək, İctimai Palatanın qarşısına qoyduğu missiyanın həyata keçirilməsindən yayınmasını, cəmiyyətdə olan etiraz dalğasının yanlış istiqamətdə yönləndirilməsi məsuliyyətini öz üzərinə götürmədiyini bəyan edib. Partiya İctimai Palatadakı fəaliyyətini dayandırıb: “AMİP hakimiyyətin zorakı addımlarını, dinc insanlara qarşı repressiv fəaliyyətini, konstitusiya ilə təsbit olunmuş sərbəst toplaşmaq hüququnun məhdudlaşdırılmasını pisləyir, aksiyalar zamanı həbs olunanların azadlığa buraxılması, qaldırılmış cinayət işlərinə xitam verilməsini tələb edir və siyasi hakimiyyəti alternativ fikrə dözümlü yanaşmağa çağırır.
Bəyan edirik ki, bundan sonra da müxalif partiya olaraq qarşımıza qoyduğumuz məqsədlər uğrunda ardıcıl fəaliyyət göstərəcəyik və bu istiqamətdə digər siyasi qüvvələri də əməkdaşlığa çağırırıq”.
