Açılış mərasimi Baş Prokuror yanında Korrupsiyaya qarşı Mübarizə Baş İdarəsində keçirilmiş, tədbirdə rəsmi qonaqlar iştirak etmişdirlər. Açılış mərasimində Baş Prokuror yanında Korrupsiyaya qarşı Mübarizə Baş İdarəsinin Preventiv tədbirlər və təhqiqat idarəsinin rəisi Səbuhi Alıyev açılış nitqi ilə çıxış edərək rəsmi qonaqları və hüquq tələbələrini salamlayıb. Korrupsiyaya qarşı mübarizə sahəsində maarifləndirmə işlərinin aparılmasının vacibliyini vurğulayan Səbuhi Alıyev bu baxımdan ELSA Azərbaycanın fəaliyyətini yüksək qiymətləndirmişdir. Daha sonra Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilov çıxış edərək Gənclər Fondunun maarifləndirmə işlərini özündə ehtiva edən layihələrə daim xüsusi diqqət göstərdiyini bildirmiş və bu istiqamətdə ELSA Azərbaycanın indiyədək bir çox layihələrinə dəstək olduqlarını vurğulanıb.

 

Hüquq Akademiyasının açılış mərasimində, eyni zamanda, Azərbaycan Respublikasının Vəkillər Kollegiyasının Baş katibi Bayram Orucov, ADA Universitetinin Hüquq fakültəsinin dekanı Rəşad İbadov, Bakı Dövlət Universitetinin Mülki proses və kommersiya hüququ kafedrasının müdiri Əsmər Əliyeva, ELSA Azərbaycanın Prezidenti Nərminə Hüseynzadə və ELSA Azərbaycanın Xəzinədarı Nazim Çələbiyev çıxış ediblər.

 

Qeyd edək ki, Hüquq Akademiyasının əsas məqsədi hüquq tələbələrini və gənc hüquqşünasları ölkəmizdə korrupsiyaya qarşı mübarizə sahəsində həyata keçirilən islahatlar, o cümlədən institusional və qanunvericilik tədbirləri barədə maarifləndirmək, beynəlxalq antikorrupsiya tədrisi təcrübəsi nəzərə alınmaqla, onların bu sahə üzrə bilik və bacarıqlarını artırmaqdan ibarətdir.

 

Layihə çərçivəsində iştirakçılara 3 gün ərzində korrupsiya ilə mübarizə sahəsində peşəkarlar tərəfindən müxtəlif təlimlər keçiriləcəkdir.