Sərnişindaşıma sahəsində təhlükəsizliyin təmin edilməsi, bu istiqamətdə qanunvericiliyin tələblərinə əməl olunmasına nəzarətin artırılması məqsədilə Astarada polis əməkdaşları tərəfindən profilaktik tədbir keçirilib.
AZXEBER.COM xəbər verir ki, tədbir zamanı sərnişindaşıma fəaliyyəti göstərən avtobus və mikroavtobusların texniki vəziyyəti, normadan artıq sayda oturacaqların quraşdırılması, sürücülərin müvafiq kateqoriyalı nəqliyyat vasitələrini idarə etmək hüququnun olub-olmaması, onların tibbi müayinədən keçməsi və digər normativ tələblər yoxlanılıb. Sürücülərlə profilaktik söhbətlər aparılıb və hərəkətin təhlükəsizliyinin təmin edilməsi ilə bağlı tövsiyələr verilib.
Bundan əlavə, yol polisi əməkdaşları tərəfindən keçirilən profilaktik tədbirlər zamanı idarə etdiyi "Vaz" markalı nəqliyyat vasitəsi ilə yol hərəkəti qaydalarını pozduğuna görə sürücü İsgəndər Hacıyev saxlanılıb. Yoxlanış və müvafiq tibbi müayinə zamanı onun avtomobili narkotik vasitənin təsiri altında idarə etdiyi müəyyən edilib. Barəsində toplanmış material baxılması üçün məhkəməyə göndərilib və İ.Hacıyev 10 sutka inzibati qaydada həbs edilib.
