Avropa İttifaqı (Aİ) Komissiyası şirkətlərin Avropa bazarına təqdim etdikləri süni intellekt sistemlərinin təhlükəsiz olduğunu sübut etməli olduqlarını açıqlayıb.
AZXEBER.COM xarici mətbuata istinadən xəbər verir ki, bunu Aİ Komissiyasının sözçüsü Tomas Renye Brüsseldə keçirilən gündəlik mətbuat konfransında süni intellekt modellərinin təhlükəsizlik məqsədilə hazırlanma sürətinin azaldılması ilə bağlı sualları cavablandırarkən deyib.
Renye Aİ-nin süni intellekt təhlükəsizliyi məsələsində fəal rol oynadığını və bu sahədə öncül mövqedə olduğunu bildirib.
Onun sözlərinə görə, süni intellekt sistemlərinin hazırlanması və istifadəyə verilməsi zamanı vətəndaşları qorumaq üçün təhlükəsizlik tədbirləri həyata keçirilir.
"Süni İntellekt haqqında Qanun qüvvədədir və biz onu tətbiq edirik. İlk məlumat sorğularımızı da göndərmişik”, - deyə Renye qeyd edib.
Süni intellekt modellərinin hazırlanmasının sürətləndirilməsi və ya yavaşladılması ilə bağlı müzakirələrə toxunan Aİ rəsmisi İttifaqın texnoloji innovasiyaları dəstəklədiyini vurğulayıb.
Renye bildirib ki, süni intellekt xidmətləri qanuna və Aİ tərəfindən müəyyən edilmiş təhlükəsizlik tədbirlərinə tam uyğun olduğu təqdirdə Avropa bazarında müsbət qarşılanır.
Süni intellekt şirkəti "Anthropic”in süni intellektin inkişaf sürətinin azaldılması ilə bağlı təkliflə Aİ Komissiyasına müraciət edib-etmədiyi barədə suala cavab verən Renye belə bir görüşdən xəbərdar olmadığını deyib. O, mümkün ikitərəfli təmaslarla bağlı açıqlama verməyəcəklərini bildirib.
Renye Aİ-nin Kibertəhlükəsizlik Agentliyinin (ENISA) ən qabaqcıl süni intellekt modellərinin əksəriyyətinə çıxışının olduğunu və həmin modelləri sınaqdan keçirdiyini xatırladıb.
O vurğulayıb ki, şirkətlərin Aİ qaydalarına əməl etməsi seçim məsələsi deyil, qanuni öhdəlikdir.
"Ən yeni və innovativ modellərin Avropada istifadəyə verilməsini istəyirik, lakin təhlükəsizlik standartlarımızdan güzəştə getməyəcəyik. Öhdəlik şirkətlərin üzərinə düşür. Onlar xidmətlərinin vətəndaşlarımız tərəfindən təhlükəsiz şəkildə istifadə edilə biləcəyini sübut etməlidirlər”, - deyə Tomas Renye bildirib.
Qeyd edək ki, "Anthropic” şirkətinin baş direktoru Dario Amodei süni intellekt sistemlərinə nəzarətlə bağlı narahatlıqların artması fonunda şirkətləri süni intellekt modellərinin inkişaf sürətini azaltmağa çağırıb.
"Tesla” və "SpaceX” şirkətlərinin baş direktoru İlon Mask, eləcə də ABŞ-ın "OpenAI” şirkətinin baş direktoru Sem Altman sosial media hesablarında Amodeinin çağırışını dəstəkləyiblər.
