Gəncə Avtomobil Zavodunun istehsal müəssisəsi ilə tanış olan belaruslu qonaqlar burada Azərbaycan və Belarus avtomobil istehsalçılarının iş birliyi nəticəsində yığılan maşın və texnikalarla tanış olub. Jurnalistlərin suallarını cavablandıran Belarus hökumət başçısının müavini Azərbaycan və Belarus arasındakı iqtisadi əlaqələrin yüksək səviyyədə olduğunu, Azərbaycanı ölkəsinin etibarlı tərəfdaşı hesab etdiklərini bildirib.“Gəncə Avtomobil Zavodunda bizim ölkənin avtomobil müəssisələri ilə iş birliyi çərçivəsində istehsalın getdikcə genişlənməsi ölkələrimiz arasında sıx əməkdaşlığın nümunələrindəndir. Fikrimizcə, bu müəssisə ilə birgə yaxın gələcək üçün əsas prioritetlər kənd təsərrüfatı üçün vacib olan maşın və texnikaların istehsalının genişləndirilməsi, eləcə də digər təyinatlı yeni avtomobillərin yığılması olacaq. Həmçinin yeni servis məntəqələrinin açılması haqda düşünürük”, - deyə Vladimir Semaşko bildirib.Qeyd edək ki, görüşdə həmçinin şəhərlərarası “MAZ” avtobuslarının Gəncədə yığım perspektivləri müzakirə olunub.Xatırladaq ki, Gəncədəki müəssisə “Minsk avtomobil zavodu” və “Minsk traktor zavodu” müəssisələrilə əməkdaşlığa başladığı 2007-ci ilin mart ayından indiyədək 3254 ədəd “Belarus” traktorları, 1686 ədəd “MAZ” yük avtomobilləri istehsal edib.
//anspress
