Səhər evdən çıxarkən geyinilən ayaqqabı çox vaxt yalnız axşam çıxarılır. İşdə, universitetdə, uzun yol gedərkən və ya ayaqüstə işləyən insanlar gün ərzində ayaqlarını saatlarla ayaqqabının içində saxlayırlar.
AZXEBER.COM xəbər verir ki, podiatrlar və dermatoloqların fikrincə, ayaqlar insan bədənində ən çox tər ifraz edən nahiyələrdən biridir. Bir ayaqda 250 mindən çox tər vəzi yerləşir və gün ərzində təxminən 200-500 millilitrə qədər tər ifraz oluna bilər. Ayaqqabının havasız qalması isə nəmli mühit yaradır və bakteriya, göbələk kimi mikroorqanizmlərin çoxalması üçün əlverişli şərait formalaşdırır.
Mütəxəssislərin sözlərinə görə, ayaqqabıda uzun müddət qalan ayaqlarda ilk növbədə xoşagəlməz qoxu yaranır. Bunun səbəbi tərin özü deyil, nəm mühitdə çoxalan bakteriyalardır. Əgər ayaqqabı kifayət qədər hava keçirmirsə və corab uzun müddət dəyişdirilmirsə, bu problem daha da güclənə bilər.
Araşdırmalar göstərir ki, gün ərzində ayaqların davamlı sıx vəziyyətdə qalması ayaqlarda şişkinlik və yorğunluq hissini də artırır. Xüsusilə ayaqüstə çalışanlar və ya saatlarla oturaq vəziyyətdə işləyənlər günün sonunda ayaqlarda ağırlıq, ağrı və gərginlik hiss edə bilərlər. Dar və uyğun olmayan ayaqqabılar isə barmaqların sıxılmasına, dırnaq problemlərinə, qabarların və deformasiya riskinin artmasına səbəb ola bilər.
Həkimlər bildirirlər ki, rütubətli və havasız mühit göbələk infeksiyalarının yaranması üçün ən əlverişli şəraitdir. Ayaqlarda qaşınma, qabıqlanma, qızartı və çatlar müşahidə olunursa, bu, göbələk infeksiyasının ilk əlamətləri ola bilər. Müalicə olunmadıqda infeksiya dırnaqlara da yayıla bilər və sağalma prosesi aylarla davam edə bilər.
Bundan əlavə, ayaqqabıda uzun müddət qalmaq qan dövranına da müəyyən təsir göstərə bilər. Xüsusilə dar ayaqqabı geyinən və ya hərəkətsiz qalan insanlarda ayaqlarda keyimə, iynəbatma hissi və qan dövranının zəifləməsi müşahidə oluna bilər. Varikoz problemi olan insanlarda isə narahatlıq daha da arta bilər.
Mütəxəssislər bildirirlər ki, bu riskləri azaltmaq üçün gün ərzində imkan olduqca ayaqlara qısa müddətlik istirahət vermək, ayaqqabını çıxarmaq, nəfəs alan materialdan hazırlanmış ayaqqabı və pambıq corablara üstünlük vermək vacibdir. Ayaqqabının hər gün havalandırılması, corabın gündəlik dəyişdirilməsi və ayaqların yuyulduqdan sonra tam qurudulması da infeksiyaların qarşısını almaqda mühüm rol oynayır.
Fəridə Əsədzadə
