Azərbaycan dünya çempionluğu uğrunda matça ev sahibliyi edə bilər

Şahmat üzrə Dünya çempionluğu matçı ölkəmizdə keçirilə bilər. ANS PRESS-in Rusiyanın “Sport-Ekspress” qəzetinə istinadən verdiyi məlumata görə, bu məlumatı FİDE vitse-prezidenti İlya Levitov verib. 

“Dünya çempionluğu uğrunda matçın harada keçiriləcəyi hələlik məlum deyil. Daha dəqiq desək, bu matçın hansı ölkədə keçiriləcəyi “Dünya Şahmat Tacı”na namizədlərin yarışının nəticəsindən asılı olacaq. Əgər bu yarışda Levon Aronyan qələbə qazansa, o zaman Ermənistan dünya çempionluğu uğrunda matça ev sahibliyi etmək istəyəcək. Yox əgər namizədlərin matçını azərbaycanlılardan biri qazansa, Azərbaycan dünya çempionluğu matçını təşkil etmək istəyəcək. Əgər Topalov qalib gələrsə, Bolqarıstan öz istəyini ortaya qoyacaq”, - deyə İlya Levitov bildirib. 

Xatırladaq ki, “Dünya Şahmat Tacı” uğrunda namizədlərin yarışı bu ilin mayın 3-dən 27-dək Rusiyanın Kazan şəhərində keçiriləcək. Yarışda Şəhriyar Məmmədyarov, Boris Gelfand, Teymur Rəcəbov, Vladimir Kramnik, Veselin Topalov, Qata Kamski, Levon Aronyan və Aleksey Qrişuk qalib adı uğrunda mübarizə aparacaq. Turnirin qalibi isə dünya çempionu hindistanlı Vişvanatan Anandla mübarizə aparmaq hüququ qazanacaq.