Heydər Əliyev Fondunun təşəbbüsü, ölkəmizin Rusiyadakı səfirliyinin dəstəyi ilə baş tutan və Dövlət Kreml Sarayında keçirilən mərasimdə Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva və Rusiyanın birinci xanımı Svetlana Medvedeva iştirak ediblər. Burada Azərbaycanın və Rusiyanın birinci xanımları “Karl Faberje və daşoyma ustaları. Rusiyanın əlvan dəfinəsi” adlı sərgiyə baxıblar. Ekspozisiyada görkəmli rus zərgəri Karl Faberjenin şah əsərləri nümayiş etdirilib. Mehriban Əliyeva və Svetlana Medvedeva sərgidə Faberje ilə eyni dövrdə yaşayan və imperator sarayı üçün zinət əşyaları hazırlayan zərgərlərin, ural sənətkarlarının işləri də tanış olublar.
Dövlət Kreml Sarayında “Azərbaycan gecəsi” çərçivəsində Heydər Əliyev Fondunun ən uğurlu layihələrindən olan “Azərbaycan” nəşrinin rus dilindəki versiyasının təqdimatı olub. Burada Azərbaycan xalçalarının sərgisi də keçirilib. Sərgidə Azərbaycan bölgələrinə məxsus 80-dən çox xalça nümunələri nümayiş etdirilib. “Azərbaycan gecəsi” adlı təntənəli mərasimdə qonaqlara Azərbaycan milli mətbəxinin nümunələri təqdim olunub.
