Əməkdar jurnalist, siyasi şərhçi Azər Həsrətin "İslam dini, Türk millətinin başına gəlmiş ən böyük bəladır” fikirlərindən sonra Türkiyədə ona qarşı geniş etiraz kampaniyası başlayıb. Xüsusən "X" sosial şəbəkəsində səsləndirilən sərt reaksiyalar fonunda məsələ ictimai müzakirə mövzusuna çevrilib və jurnalistin açıqlamalarına münasibət gündəmdə qalmaqda davam edir.
AZXEBER.COM mövzu ilə bağlı Azər Həsrət ilə əlaqə saxlayıb.
O bildirib ki, bu məsələyə görə, sosial media hesabları son bir həftədir ki, aramsız hücumlara məruz qalır:
"Təəssüf ki, qardaş Türkiyədə cahil bir müəyyən kəsim toplum var. O cahil kəsim hər şeyi din pərdəsi altında görməyə alışıb və iddia edirlər ki, İslam yoxdursa, türklük də yoxdur. Yəni, bu cür adamlar mənim kimi insanları təhqir etməklə məşğuldurlar. Sosial media hesablarım son bir həftədir mesajla "dağılır”. Baxıram ki, hər şeydə ittiham edirlər, şiə olduğum üçün söyürlər. Halbuki mən əslində şiə deyiləm, dindar olmasam da, sünni məzhəbindənəm. Bizim ailəmizdə, yaxud bölgəmizdə, ümumilikdə bu belədir”.
O qeyd edib ki, bu kampaniyaların arxasında İran və Rusiya dayanır:
"Ondan başqa bir kəsim də var ki, "İslam yoxdursa, türklük də yoxdur” deyir. Mən də o adamlara sual verirəm ki, 1400 il öncə İslam yox idi, onda biz millət olaraq yox idik? İnsan necə öz dədə-babasından imtina edə bilər? Bu kampaniyaların arxasında əminəm ki, bir tərəfində Rusiya, digər tərəfində İran dayanır. Bir tərəfdə də qardaş Türkiyədəki o antitürk mərkəzlər dayanır. Mən çox da bu kampaniyalardan narahat deyiləm. Biz sözümüzün üstündə dayanan, qara ilə ağın arasında üzüağ çıxan adamlarıq”.
Azər Həsrət bildirib ki, Azərbaycanda da ona qarşı kampaniya aparan bəzi şəxslər var:
"Məni sadəcə narahat edən odur ki, Azərbaycanda da müəyyən bir kəsim var ki, onlar da mənə qarşı kampaniya aparır. O kəsimin Rusiyaya, yaxud İrana bağlılığı şübhə doğurmur. Baxıram ki, onlar da çox fəallaşıblar, mənə qarşı kampaniyada iştirak edirlər. Bizim hədəflərimiz böyükdür. Bu hədəfə gedən yolda bizə hürən hər itə dayanıb daş atsaq, gedib hədəfə çata bilmərik”.
Şahanə Ziyad
